مەسرور بارزانی لە پێداویستییەکانی نەخۆشخانەی ھیوا دەکۆڵێتەوە

- سەرۆکی حکوومەتی ھەرێمی کوردستان، مەسرور بارزانی، لە دوو پەیوەندیی تەلەفۆنییدا لەگەڵ وەزیری تەندروستی، سامان بەرزنجی و بەڕێوەبەری گشتیی تەندروستیی سلێمانی، سەباح ھەورامی، لە کێشە و پێداویستییەکانی نەخۆشخانەی ھیوای کۆڵییەوە.

هەولێر - AA

سەرۆکی حکوومەتی ھەرێمی کوردستان، مەسرور بارزانی، لە دوو پەیوەندیی تەلەفۆنییدا لەگەڵ وەزیری تەندروستی، سامان بەرزنجی و بەڕێوەبەری گشتیی تەندروستیی سلێمانی، سەباح ھەورامی، لە کێشە و پێداویستییەکانی نەخۆشخانەی ھیوای کۆڵییەوە و رایسپاردن کە بەزووترین کات لێکۆڵینەوەی پێویست بکەن و کێشە و گرفتەکانی نەخۆشخانەکە چارەسەر بکەن.

بە گوێرەی راگەیەندراوێکی نووسینگەی راگەیاندنی سەرۆکی حکوومەتی ھەرێمی کوردستان، لە میانی هەردوو پەیوەندییە تەلەفۆنییەکەدا، مەسرور بارزانی پاڵپشتی خۆی و حکوومەتی ھەرێمی کوردستانی بۆ دابینکردنی ھەموو پێداویستییەکانی نەخۆشخانەی ھیوا و ھەموو نەخۆشخانەکانی چارەسەرکردنی تووشبووانی شێرپەنجە دووپات کردەوە و جەختیکردەوە کە نابێت ھیچ کەمتەرخەمی و پاشەکشەیەک لەو خزمەتگوزارییە تەندروستییانەدا بکرێت کە پێشکەشی نەخۆشانی شێرپەنجە دەکرێت.