لە هەولێر یادی رۆژی شەهیدی تورکمان کرایەوە

ھەولێر- AA

بەرەی تورکمانی عێراقی لە بارەگای خۆی لە ھەولێر یادی ٢٤ ساڵەی شەھیدانی ٢ی ئەیلوولی کردەوە.

ئەندامی مەکتەبی سیاسی بەرەی تورکمانی عێراقی ، ئایدن مەعروف لە لێدوانێکدا بۆ ئاژانسی ئانادۆڵو رایگەیاند "ئێمە وەک تورکمانەکانی ھەولێر ساڵانە ئەم یادە دەکەینەوە، ئەمساڵیش بە ئامادەبوونی خانەوادەی شەھیدان یادەکە بەرز رادەگرین".

ئایدن مەعروف گوتیشی "لەکاتی شەڕی ناوخۆ لەنێوان یەکێتی و پارتی و لەدوای رووداوی ٣١ی ئاب لایەنی سێھەم کە ھێزەکانی حکوومەتی بەعس بوون، لە ھەولێر ژمارەیەک ھاووڵاتی تورکمانیان لە بارەگاکانی بەرەی تورکمانی و لایەنەکانی دیکەی تورکمانی ھەولێر رفاند و لە رۆژی دووی ئەیلوول لە بەغدا لەسێدارەی دان و شەھید کران".

ئەندامی مەکتەبی سیاسی بەرەی تورکمانی، ئایدن مەعروف راشیگەیاند "لەلایەن تورکمانەکانی ھەولێر دووی ئەیلوول وەک رۆژی شەھید دانراوە، لەو کاتەدا ٤٨ کەس لە سەرکردە و پاسەوانی بارەگاکانی لایەنە تورکمانەکانیان رفاند و بەبێ ھیچ دادگاییەک لەسێدارەیان دان".

ئایدن مەعروف گوتیشی "ئێمە داوادەکەین و بۆمان گرنگە کە ھەموو شەھیدانی عێراق و ھەرێمی کوردستان بە یەک چاو سەیربکرێن، خانەوادەی ئەم شەھیدانە لەلایەن حکومەتی عێراق دوای پرۆسەی ئازادی قەرەبووی ماددی کرانەوە، بەڵام گرنگە قەرەبووی مەعنەوی بکرێنەوە و رێزیان لێ بگیرێت چونکە رۆڵەکانیان لەپێناوی ئەم نیشتمانە شەھید بوون".