ھەولێر ــ AA

ڕاوێژکاری ئاسایشی نەتەوەیی عێراق، قاسم ئەعرەجی ڕایگەیاند لەسەر بنەمای ھەڵسەنگاندنی دۆخی ناوخۆ و دەرەوە، داوایانکردووە پرسی دەنگدان بە پرۆژەیاسای حەشدی شەعبی بۆ دوای ھەڵبژاردنی ئەنجوومەنی نوێنەرانی عێراق دوابخرێت.

قاسم ئەعرەجی لە دیمانەیەکدا لەگەڵ کەناڵی ئەلشەرقییە ئاماژەی بەوەدا کە حەشدی شەعبی بەشێکی سەرەکی و ڕیشەییە لە سیستەمی ئاسایش و بەرگریی عێراق، بۆیە ڕێگە بە ھیچ دۆست ونەیارێک نادەن وەک پێشنیاز، داوای ھەڵوەشاندنەوەی حەشدی شەعبی بکات، چونکە لە ژێر چەتری فەرماندەیی گشتیی ھێزە چەکدارەکانە.

گوتیشی: "داوامان کردووە پرسی تێپەڕاندنی یاسای حەشدی شەعبی لە ئەنجوومەنی نوێنەران دوابخرێت و دەنگدان بە پرۆژە یاساکە بۆ دوای ھەڵبژاردنی ئەنجوومەنی نوێنەران دوا بخرێت".

ڕاشیگەیاند: "پرۆژەیاساکە ھەم لە ئاستی ناوخۆی عێراق و ھەم لە ئاستی دەرەوەش پێویستی بە ڕوونکردنەوەی زیاترە، بەر لەوەی بخرێتە دەنگدانەەوە، لەبەر ئەوە بڕیاردرا دەنگدان بە پرۆژەیاساکە بۆ دوای ھەڵبژاردنی ئەنجوومەنی نوێنەرانی عێراق دوابخرێت".