عێراق.. بەرهەم ئەحمەد ساڵح پێشوازی لە وەزیری دەرەوەی قەتەر کرد

بەغدا - AA

سەرکۆماری عێراق، بەرهەم ئەحمەد ساڵح لە کۆشکی سەلام لە بەغدا پێشوازی کرد لە جێگری سەرۆکوەزیران و وەزیری دەرەوەی قەتەر، محەمەد بن عەبدولرەحمان ئال سانی و کۆبوونەوە.

بەپێی راگەیەندراوێکی نووسینگەی سەرۆکایەتیی کۆماری عێراق لە کۆبوونەوەکەدا، رەوشی ئێستای ناوچەکە و جیھان و چۆنیەتی هێۆرکردنەوەی رەوشەکە گفتوگۆی لەبارەوەکراوە بۆ پارێزگاریکردن لە ئاسایش و سەقامگیری ناوچەکە، ھەروەھا جەختکرایەوە لەسەر پێویستی دان بەخۆدا گرتن و پەنابردن بۆ زمانی دیالۆگی ژیرانە بە ئامانجی کەمکردنەوەی ئاستی گرژییەکان.

لە کۆبوونەوەکەدا سەرکۆماری عێراق جەختی لەوە کردەوە کە عێراق هەوڵ دەدات ببێت بە هۆکاری ئارامی و ناوەندێکی ئاشتی لە ناوچەکەدا، ھاوکات پشتیوانی یەکخستنی هەوڵەکان دەکات بۆ چارەسەرکردنی قەیرانەکانی ئێستا، بەجۆرێک گەلانی ناوچەکە لە ئاشتی و خۆشگوزەرانیدا بژین.

بەرهەم ئەحمەد ساڵح ئاماژەی بەوەیشکرد کە عێراق نابێتە ناوەندێک بۆ دەستدرێژیکردنە سەر وڵاتانی دراوسێ و گۆرەپانێک بۆ جەنگێکی نوێ کە توانا و وزەی گەلان لە باربەرێت.

لای خۆیەوە وەزیری دەرەوەی قەتەر دووپاتی لە رەوشی هەستیاری ئێستا کردەوە و ئاماژەی بە گرنگی هەماهەنگی و کاری هاوبەش لەگەڵ لایەنە هەرێمیی و نێودەوڵەتییەکان کرد لەپێناو گەشتن بە چارەسەرێکی ئاشتییانە کە ئاسایش و ئارامی ناوچەکە بپارێزێت.

هەروەها لە کۆبوونەوەکەدا، چۆنیەتی گەشەپێدانی پەیوەندییە دووقۆڵییەکانی نێوان عێراق و قەتەر گفتوگۆی لەبارەوەکرا، بەجۆرێک ئەو پەیوەندییانە خزمەت بە بەرژەوەندی هاوبەشی هەردوو گەلی برا بکات.