ھەولێر - AA

بازاڕی ماسی لە مووسڵ بە یەکێک لە بەناوبانگترین بازاڕەکانی ماسی لە عێراق ناسراوە.

بەنداوی مووسڵ و هاوکات بوونی چەندین حەوزی بەخێوکردنی ماسی، سەرچاوە سەرەکییەکانی دابینکردنی ماسین لە شارەکە و ئەوەی زیاتر بۆ خەڵکی شارەکە و شارەکانی دیکە گرنگە، بوونی بازاڕێکی تایبەتە بە برژاندنی بە جۆری جیاواز و خستنەڕوویەتی بۆ کڕیاران.

ئەگەرچی ئەم شارە ماوەی نزیکەی سێ ساڵ لە لایەن تیرۆریستانی داعش داگیرکرا، بەڵام لەگەڵ ئازادکردنی شارەکە، کاسبکارەکان گەڕانەوە و دەستیان کرد بە ئاوەدانکردنەوەی بازاڕەکە.

زۆرێک لە دوکان و شوێنەکانییان زیانیان پێگەیشتبوو یان وێران ببوون، بەڵام ھەر زوو کاسبکاران توانییان شوێنەکانییان نۆژەنی بکەنەوە و دەست بە کاسبی ڕۆژانەی خۆیان بکەن.

لە مووسڵی کۆن یەکێک لە سیما ھەرە بەردەوامەکان بریتییە لە بازاڕێکی کولتووری نەریتی کە بە برژاندن و سوورکردنەوەی ماسی ناسراوە، ئەم بازاڕە بۆ چەندین نەوە نەک تەنھا وەک ناوەندێکی بازرگانی بووە بەڵکو وەک ئەرشیفێکی زیندووش، لە شارەکەدا ماوەتەوە.

ئەوە جگە لە خەڵک و دانیشتووانی شارەکە، لە شارەکانی دیکەشەوە خەڵکانێک ڕوو لە بازاڕەکە دەکەن.

ئەو گەشتیار و سەردانیکارانەی کە دەچنە ناو کوچە و کۆڵانەکانی ئەم بازاڕە، چەندین دیمەنی سەرنجڕاکێش دەبینن بە نمایشکردنی چەندین جۆری ماسی و بەرزبوونەوەی ئەو دووکەڵە چڕەی کە ئاگرەکەی لەناوەڕاستی چەند ماسییەک داگیرسێنراوە.

ماسییەکان لەسەر سینییەکان بە شێوەیەکی بازنەیی لە چواردەورییەوە ھەڵواسراون، ئەمە جگە لە ژاوەژاوی ئۆتۆمبێل و قرچەی ڕۆن و دەنگی بەرزی فرۆشیارەکان بۆ ڕاکێشانی موشتەرییەکانیان.

بە چەند شێوازێک ماسییەکان وەک خۆراک بۆ موشتەرییەکان ئامادە دەکرێت، سوورکردنەوە لە ڕۆندا، برژاندن بە ئاگر و یان پیشاندنی بە فڕنی تایبەت، ئەو شێوازە تایبەتەی بازاڕی ماسی مووسڵە.

ئەمڕۆ بازاڕەکە ھەم خەڵکی ناوچەکە و ھەم سەردانیکارانی بە تامەزرۆییەوە ڕادەکێشێت بۆ تامکردنی جۆرەکانی ماسی و لە کاتەکانی ئێواراندا بازاڕەکە جمەی دێت و خەڵکێکی زۆر لە ناوچە جیاوازەکانی عێڕاقەوە سەردانی دەکەن.