حکوومەتی هەرێم سەرکۆنەی هێرشە تیرۆریستییەکەی ئەنقەرە دەکات

ھەولێر - AA

حکوومەتی ھەرێمی کوردستان-عێراق، ئیدانەی ئەو ھێرشە تیرۆریستییە دەکات کە بەیانی ئەمڕۆ بەڕێوەبەرایەتیی ئاسایشی گشتی لە ئەنقەرە کردە ئامانج.

لە ڕاگەیەندراوێکدا کە گوتەبێژی حکوومەتی ھەرێم، پێشەوا ھەورامانی بڵاویکردووە، داوا دەکرێت ھاوکاری و ھەماھەنگی نێودەوڵەتی ھەبێت بۆ ڕێگریکردن لە تیرۆر و بیری تیرۆریستی لە جیھاندا.

لە ڕاگەیەندراوەکەی حکوومەتی ھەرێمدا وێڕای سەرکۆنەکردنی ھێرشە تیرۆریستییەکەی بەڕێوەبەرایەتیی ئاسایشی گشتی لە ئەنقەرە، ڕاشیگەیەندراوە: "حکوومەتی ھەرێمی کوردستان ھەڵوێستی نەگۆڕی خۆی دژی ھەر کارێکی تیرۆریستی و تووندڕەویی دووپاتدەکاتەوە".

لە کۆتایی پەیامەکەی حکوومەتی ھەرێمدا ھاتووە: "داوای بەھێزکردنی ھاوکاری و ھەماھەنگی نێودەوڵەتی دەکات بۆ ڕێگری لە تیرۆر و بیری تیرۆریستی لە جیھاندا و ڕێگری لە چالاکییەکانیان".