حکوومەتی عێراق ھەڵبژاردنی ئەنجوومەنی پارێزگاکانی بۆ کاتێکی نادیار دواخست

بەغدا – AA

ئەمڕۆ سێشەممە، حکوومەتی عێراق بڕیاریدا لەسەر دواخستنی ھەڵبژاردنی ئەنجوومەنی پارێزگاکانی عێراق بۆ کاتێکی نادیار ، بەبێ روونکردنەوەی ھۆکارەکان.

نوسینگەی راگەیاندنی سەرۆکوەزیرانی عێراق، عادل عەبدولمەھدی لە راگەیەندراوێکدا رایگەیاندووە کە لە کۆبوونەوەی ئەمڕۆی ئەنجوومەنی وەزیران، بڕیاردراوە لەسەر دواخستنی ھەڵبژاردنی ئەنجوومەنی پارێزگاکان بۆ کاتێکی نادیار کە لەداھاتوودا رۆژێک بۆ ئەو ھەڵبژاردنە دیاری دەکرێت.

بڕیاربوو ھەڵبژاردنی ئەنجوومەنی پارێزگاکانی عێراق لە سەرەتای مانگی نیسانی داھاتوو بەڕێوەبچێت.

مانگی رابردوو، پەرلەمانی عێراق بڕیاری ھەڵپەساردنی کاری ئەنجوومەنی پارێزگاکانی دەرکرد، ئەوەش وەک وەڵامدانەوەیەک بۆ داواکاری خۆپیشاندەرانی عێراقی کەلەسەرەتای مانگی تشرینی یەکەمی رابردووەوە دەستیان بە خۆپیشاندان کردووە.

حکوومەتی عێراق ھۆکاری بڕیاری دواخستنی ئەو ھەڵبژاردنەی روون نەکردووەتەوە، بەڵام پێدەچێت بۆ رەخساندنی ھەلی زیاتر بێت لەبەردەم ھەموارکردنەوەی یاسای ھەڵبژاردنەکان پێش بەڕێوەچوونی ھەر پڕۆسەیەکی ھەڵبژاردن.

یەک لە نیگەرانی و داواکاری خۆپیشاندەران، لەسەر یاسای ھەڵبژاردنەکانە و پێیان وایە ئەو یاسایە خزمەت بە لایەنە سیاسییە دەسەڵات دارەکان دەکات لەسەر حسابی لایەنە بچووک و سەربەخۆکان.