"حکوومەتی عێراق ناچارە بە زەبری ھێز پەکەکە لە شنگال دەربکات"

ھەولێر ــ AA

نوێنەری حکوومەتی ھەرێمی کوردستان لە فەرماندەیی ھێزە چەکدارەکانی عێراق، لیوا عەبدولخالق تەلعەت رایگەیاند "ئەگەر رەوشی شنگال بەم شێوەی ئێستا بمێنێتەوە و چەکدارانی پەکەکە و ھەموو ئەو چەکدارانەی دیکە کە ناشەرعین لە ناوچەکە نەکشێنەوە، ئەوا حکوومەتی عێراق ناچار دەبێت بە زەبری ھێز لە شنگال و دەورووبەری وەدەریان بنێت".

لیوا عەبدولخالق تەلعەت لە لێدوانێکدا بۆ ماڵپەڕی فەرمیی پارتی دیموکراتی کوردستان ئاماژەی بەوە داوە کە ئێستا ھیچ بەندێکی رێککەوتنی ھەرێم و بەغدا بۆ ئاساییکردنەوەی رەوشی شنگال جێبەجێ نەکراوە و لە داھاتوودا کێشەی گەورە لە جێبەجێنەکردنی رێککەوتنی شنگال دەکەوێتەوە و گوتی: "ئەگەر رەوشی شنگال بەم شێوەی ئێستا بمێنێتەوە و چەکدارانی پەکەکە و ھەموو ئەو چەکدارانەی دیکەی کە ناشەرعین لە ناوچەکە نەکشێنەوە، ئەوا حکوومەتی عێراق ناچار دەبێت بە زەبری ھێز لە شنگال و دەورووبەری وەدەریان بنێت".

گوتیشی: "ھەتا ئەو گرووپە چەکدارانە لە شنگال دەرنەچن، ئەوا دەبنە رێگر لەبەردەم گەڕانەوەی ئاوارەکان و حکوومەتی خۆجێی شنگال، چونکە ئەوانە ئاستەنگ بۆ دانانی قایمقام و بەرپرسانی حکوومەتیش دروست دەکەن".

نوێنەری حکوومەتی ھەرێمی کوردستان لە فەرماندەیی ھێزە چەکدارەکانی عێراق راشیگەیاندووە کە چەکدارانی پەکەکە لە شنگال لە ھەموو روویەکەوە رێگری دەکەن بۆ ئەوەی رەوشی ناوچەکە ئاسایی نەبێتەوە، باسی لەوەش کرد کە چەکدارانی پەکەکە کاریگەرییان کردووەتە سەر رەوشی خزمەتگوزاری و بەڕێوەبردنی ئیدارەی حکوومەت لە شنگال، ئەو پێکدادانەی دروست دەبن لەنێوان پەکەکە و ھێزە عێراقییەکان نیشانەی ئەوەن کە پەکەکە بووەتە سەرچاوەی کێشە لە شنگال.