22 حوزەیران 2020•نوێکردنەوە: 23 حوزەیران 2020
بەغدا ــ AA
وەزیری تەندروستیی و ژینگەی عێراق، حەسەن تەمیمی رایگەیاند كە بەهۆی زیادبوونی ژمارەی تووشبووان و گیانلەدەستدان بە ڤایرۆسی كۆرۆنای نوێ (COVID-19)، عێراق چووەتە قۆناغێكی مەترسیدارەوە.
حەسەن تەمیمی لە كۆنگرەیەكی رۆژنامەوانییدا ئاماژەی بەوە داوە كە تا ئێستا هیچ چارەسەرێك بۆ ڤایرۆسی كۆرۆنا نەدۆزراوەتەوە و لەئێستادا، خۆپارێزی باشترین چارەسەرە و گوتی:
"بەم دواییانە ژمارەی تووشبووان و گیانلەدەستدان بە ڤایرۆسی كۆرۆنا لە وڵاتەكەماندا زیادی كردووە، ئەمەیش ئاماژەیە بۆ ئەوەی كە عێراق چووەتە قۆناغێكی مەترسیدارەوە".
وەزیری تەندروستیی و ژینگەی عێراق، حەسەن تەمیمی باسی لەوەیش كرد كە لە هەوڵدان بۆ ئەوەی ژمارەیەك نەخۆشخانە تایبەت بە چارەسەركردنی تووشبووان بە ڤایرۆسی كۆرۆنا ئامادە بكەن.
ئەمەیش لە كاتێكدا هۆشداری ئەوە دراوە كە هێشتا مەترسیی بڵاوبوونەوەی ڤایرۆسی كۆرۆنا لەسەر ئاستی عێراق هەیە و تا دێت بەهۆی پابەند نەبوونی هاووڵاتییان بە رێنماییەكانی خۆپارێزی، ژمارەی قوربانییانی ئەو ڤایرۆسە لەو وڵاتە روو لە هەڵكشانە.
بەپێی دوایین ئامارەكان تا ئێستا، 30 هەزار و 868 كەس لە عێراق تووشی ڤایرۆسی كۆرۆنا بوون و لەو ژمارەیەیش هەزار و 100 کەس گیانیان لەدەستداوە و 13 هەزار و 935ی دیكەیش چاكبوونەتەوە.
