ھادی عامری: "پاڵپشتی لە داواکەی موقتەدا سەدر دەکەین بۆ ئەنجامدانی ھەڵبژاردنی پێشوەختە"

ھەولێر ــ AA

سەرۆکی ھاوپەیمانی فەتح، ھادی عامری پاڵپشتی خۆی بۆ داواکەی سەرکردەی رەوتی سەدر، موقتەدا سەدر راگەیاند کە تیایدا داوای کردووە، ئەم خولەی ئەنجوومەنی نوێنەرانی عێراق ھەڵبوەشێندرێتەوە و ھەڵبژاردنێکی پێشوەختە ئەنجام بدرێت.

لەمبارەیەوە ھادی عامری کە یەکێکە لە سەرکردەکانی چوارچێوەی ھەماھەنگی راگەیەندراوێکی بڵاوکردەوە و تیایدا ھاتووە "پاڵپشتی لە ئەنجامدانی ھەڵبژاردنی پێشوەختە دەکەین کە موقتەدا سەدر داوای کردووە، بەتایبەت کە ھەڵبژاردنی رابردوو گومان و ناڕەزایەتیی زۆری لەسەر بوو".

راشیگەیاندووە "ئەنجامدانی ھەڵبژاردنی پێشوەختە، پێویستی بە گفتوگۆیەکی نیشتمانیی گشتگیر ھەیە لە پێناو دیاریکردنی وادە و دابینکردنی میکانیزم و پێداویستییەکانی ئەنجامدانی ئەو ھەڵبژاردنە، ھەروەھا رەخساندنی کەشێکی گونجاو بۆ ھەڵبژاردنێکی ئازاد، پاک و بێگەرد کە متمانەی ھاووڵاتییان بە پرۆسەی سیاسیی بگەڕێنێتەوە".

دوێنێ چوارشەممە سێی ئابی ٢٠٢٢، سەرکردەی رەوتی سەدر، موقتەدا سەدر لە گوتارێکی تەلەڤیزیۆنییدا داوای کرد ئەم خولەی ئەنجوومەنی نوێنەرانی عێراق ھەڵبوەشێندرێتەوە و ھەڵبژاردنی پێشوەخت ئەنجام بدرێت.

لەگەڵ ئەوەی ١٠ مانگ بەسەر ھەڵبژاردنە پێشوەختەکەی ئەنجوومەنی نوێنەرانی عێراقدا تێپەڕبووە، بەڵام تا ئێستا بەھۆی بەردەوامی ناکۆکییەکانی نێوان لایەنە سیاسییەکان، تا ئێستا نەتوانراوە سەرکۆماری نوێ ھەڵبژێردرێت و حکوومەتی نوێیش پێکبھێندرێت.