پیرەمەگرون.. سوتاندنی بارەگای حزب و لایەنەکان

سلێمانی ـ AA

پاش نیوەڕۆی ئەمڕۆ خۆپیشاندەرانی ناحیەی پیرەمەگرون ( ٤٣ کلم رۆژئاوای سلێمانی) ھەڵیانکوتایە سەر بارەگا حزبی و حکومییەکانی ناو ناحیەکە و زۆربەی ئەو بارەگایانەیان سوتاند.

پەیامنێری ئاژانسی ئانادۆڵو لەناو ناحیەکەوە رایگەیاند، خۆپیشاندەران کە زۆربەیان گەنجان بوون پەلاماری بارەگاکانی پارتی دیموکراتی کوردستان، بزووتنەوەی گۆڕان، یەکێتیی نیشتمانی کوردستان، یەکگرتووی ئیسلامی کوردستان، کۆمەڵی ئیسلامی کوردستان، ھەروەھا بنکەکانی ئاسایش و پۆلیسی ھاتوچۆی شارەکە و چەند فەرمانگەیەکی تریان داوە و سوتاندونیانن.

لەلای خۆیانەوە ھێزە ئەمنییەکان بۆ بڵاوە پێکردنی خۆپیشاندەران کە دەیانویست بچنە سەر فەرمانگە حکومییەکانی تری ناحیەکە، دەستڕێژی گوللـەیان بە ئاسماندا کرد.

لە چەند ناوچەیەکی تری سنووری پارێزگای سلێمانی، خۆپیشاندانەکان گرژی و ئاڵۆزییان بەخۆوە بینیوە و خۆپیشاندەران پەلاماری شوێنە حکومی و خزمەتگوزارییەکانیان داوە و رێگا سەرەکییەکانیان داخستووە.