"٨٩ مەدەنی لە مووسڵ بوونە قوربانی"

نەینەوا ــ AA

ئەفسەرلە هێزەكانی سوات، نەقیب سەعدون فەهەد رایگەیاند "بە هۆی هێرشێكی ئاسمانی بۆسەر داعش لە مووسڵ، ٨٩ مەدەنی كوژران و بریندار بوون".

لە لێدوانێكدا بۆ ئاژانسی ئانادۆڵو، سەعدون فەهەد زیاتر گوتی: "فڕۆكەیەكی جەنگی نەناسراو گردبوونەوەیەكی داعشی لە بەرامبەر مزگەوتی شەهید محەمەد نوری لە گەڕەكی زەنجیلی بەشی راستی مووسڵ بۆردومان كرد".

ئەفسەرەكە گوتیشی: "زانیاری هەبووە كە بەر لەوەی بۆردومان بكرێن، چەكدارەكانی داعش خۆیان ئامادە كردبوو هێرش بكەنە سەر هێزە عێراقییەكان لە گەڕەكی ریفاعی".

سەعدون فەهەد باسی لەوە كرد كە بە هۆی بۆردومانەكەوە ٢٥ مەدەنی كوژران كە لە ١٣ پیاو، ٩ ئافرەت و سێ منداڵ پێكهاتبوون و هەروەها ٦٤ی دیكەش بریندار بوون.

ناوبراو راشیگەیاند كە برینی ژمارەیەك لە بریندارەكان زۆر سەختە و ئەگەری هەیە گیان لەدەست بدەن.

تا ئێستا هێزە عێراقییەكان و هاوپەیمانێتی نێودەوڵەتی هیچ روونكردنەوەیەكیان لەبارەی هێرشە ئاسمانییەكەوە بڵاو نەكردووەتەوە.