''هەڵگرتنی گەمارۆکانی سەر ئێران کاریگەریی باشی لەسەر وڵاتانی (D-8) دەبێت''

ئیزمیر

موسەوی کە لەسەر بانگهێشتی لقی ئیزمیری دەستەی پیاوانی خاوەنکاری ئانادۆڵو لەو شارەیە، لە روونکردنەوەیەکیدا بۆ پەیامنێری ئاژانسی ئانادۆڵو رایگەیاند ئەندامانی شاندەکە کە پێکهاتبوون لە کاربەدەستانی باڵای وڵاتانی ئەندام و بەرپرسانی حکوومەت دوو کۆبوونەوەیان لە ئیستانبوڵ کردووە و دیدگای نوێی رێکخراوی (D-8)یان دیاریکردووە.

ئاماژەی بەوەشکرد سەرکردەکانی وڵاتانی (D-8) ئەمساڵ لە لوتەکەیەکدا کە لەئێران سازدەکرێت، کۆدەبنەوە و هەمووان هاوڕان لەسەر ئەوەی بەمەبەستی جێبەجێکردنی پرۆژەکانی قۆناغی داهاتوو، پێویستە میکانیزمێکی نوێی دارایی دابمەزرێنرێت.

سەید عەلی محەمەد موسەوی جەختی لەوەکردەوە لەگەڵ هەڵگرتنی سزاکانی سەر ئێران، وڵاتانی ئەندامی (D-8) ئەم دۆخە وەک دەرفەتێک بەکاردەهێنن.

سکرتێری گشتیی (D-8) رایگەیاند ئەو گەمارۆ و سزایانەی خرابوونە سەر ئێران کاریگەریی بەرچاوی خستبووە سەر رێکخراوەکە و رایگەیاند: ''با نموونەیەکی بەم شێوەیە بهێنمەوە، بازرگانی ناوخۆی (D-8) لەساڵی ٢٠١٢دا بریتی بوو لە ١٥٠ ملیار دۆلار، بەڵام لە ئەنجامی گەمارۆکان لە ساڵانی ٢٠١٣ و ٢٠١٤دا بەڕێژەیەکی بەرچاو دابەزی. ئەمە کاریگەریی کردە سەر دواکەوتنی ئەو بازرگانییەی کە لەنێوان وڵاتانی ئەندامدا دەکرێت، بەتایبەت ئەو بازرگانییەی لەنێوان تورکیا و ئێراندا هەیە. لەگەڵ هەڵگرتنی ئەو گەمارۆیانەدا بازرگانییەکانی نێو رێکخراوەکە بەشێوەیەکی بەرچاو زیاددەکات و هەلی نوێی کارکردن بۆ خاوەنکارانی (D-8) بەگشتیی و تورکیا بەتایبەتیی درووست دەبێت. هەرلەبەر ئەم هۆکارەیە کە هەڵگرتنی گەمارۆکان کاریگەریی ئەرێنی لەسەر رێکخراوەکە دەبێت''.

موسەوی نەیشاردەوە ئەو شەڕ و ئاڵۆزییانەی لە وڵاتانی جیهانی ئیسلامیدا هەیە و ئەو گرژییانەی لەنێوان وڵاتاندا هەیە، راستەوخۆ کاریگەریی لەسەر کارەکانی (D-8) نەبووە و لە کۆبوونەوەکانی رێکخراوەکەدا سەرکردەکانی وڵاتانی ئەندام وەزیرانی دەرەوە تاوتوێی ژمارەیەک بابەتی جۆراوجۆریان کردووە و جەختیان لەوەکردووەتەوە کە برایەتیی نیوان وڵاتانیان درزی تێنەکەوتووە''.