كۆبوونەوەی مەكتەبی سیاسی یەكێتیی نیشتمانیی كوردستان

سلێمانی – AA

ئەمرۆ بەسەرپەرشتی جێگری سكرتێری گشتی حزبەكە، كۆسرەت رەسول عەلی، كۆبوونەوەی ئاسایی مەكتەبی سیاسی یەكێتیی نیشتمانیی كوردستان لە شاری سلێمانی بەڕێوەچوو.

دوای كۆبوونەوەكە و لە كۆنگرەیەكی رۆژنامەوانیدا، گوتەبێژی مەكتەبی سیاسی یەكێتیی نیشتمانی كوردستان، سەعدی ئەحمەد پیرە لەسەر كۆبوونەوە و دوایین گۆڕانكارییەكان دواو گوتی: "یەكێتی لە رێگەی كۆبوونەوە و گفتوگۆكانی لە بەغدا هەوڵ دەدات جۆرێك لە ئارامی بۆ ناو كایەی سیاسی و پڕۆسەی سیاسی بگێڕێتەوە، رەنگە لەسەرەتای پێكهێنانی حكوومەتی فیدراڵی هەندێك گرژی دروست بووبێت و هەوڵ دەدەین ئەو گرژیانە بڕەوێتەوە و هەر لایەنێك بە ئیستیحقاقی خۆی بگات و یەكێتی ـ یش بە ئیستیحقاقی خۆی بگات".

سەعدی پیرە گوتی: "لە چەند رۆژی داهاتوو وەفدی پارتی دیموكراتی كوردستان دێتە سلێمانی بۆ گفتوگۆ و دانوستان لەگەڵ یەكێتی تایبەت بە پێكهێنانی حكوومەتی نوێی هەرێمی كوردستان، دیارە تەنها ئەوە نییە و پێویست بە رێكەوتنامەیەكی سیاسیش دەكات لەسەر كێشە سیاسییەكانی عێراق و دەوروبەر".

ئەو گوتی: "یەكێتی دەیەوێت لە حكوومەتی عێراق و هەرێمی كوردستان هاوبەشێكی واقیعی بێت، رەنگە ئێمە لە حكوومەتی هەرێمی كوردستان نەگەڕێینەوە بۆ سەردەمی 50 بە 50 كەی كۆن، بەڵام دەبێت یەكێتی لە بواری ئەمنی و ئابووری و سیاسی سیمای هاوبەشی پێوە دیار بێت، لە هەمان كاتیش پێویستمان بەوەش دەبێت بۆ دەستنیشانكردنی پشكەكان لە كۆبوونەوەكانی داهاتوو لە كۆبوونەوە داخراوەكان یەكلا دەكرێتەوە".

گوتەبێژی مەكتەبی سیاسی یەكێتی رەتی كردەوە لە هیچ كۆبوونەوەیەكی نێوان حزبەكەی و پارتی دیموكراتی كوردستان باس لە دانانی دوو جێگر بۆ سەرۆكوەزیرانی هەرێمی كوردستان كرابێت.

سەعدی پیرە باسی لەوەش كرد، لە كابینەكەی سەرۆكوەزیرانی عێراق، عادل عەبدولمەهدی ـ ش هەندێك كێشە و گرفت هەیە، بەتایبەت لەنێوان پارتی دیموكراتی كوردستان و یەكێتیی نیشتمانی كوردستاندا ئەوەش بەهۆی رێكنەكەوتنی هەردوولا لەسەر دیاری كردنی كاندیدێكی هاوبەش بۆ پۆستی سەركۆماری عێراق، ئەو لەو بارەیەوە گوتی: "دەتوانین لە رێگەی گفتوگۆی نەرمەوە چارەسەری ئەوە بكەین".

سەبارەت بە كاندیدانی حزبەكەی بۆ پۆستەكان لە حكوومەتی نوێ‌، سەعدی پیرە گوتی: "پێویستە سەرەتا لەسەر پۆستەكان رێكبكەوین تا بزانین ئەو پۆستە تەعریفی چییە و كێ‌ دەتوانێت پڕی بكاتەوە، ئەوەش لە كۆبوونەوەی داهاتووی نێوان لایەنە سیاسییەكان ئەو بابەتە یەكلا دەكرێتەوە".