كورد بە مەرجی پێشوەختە ئامادەی گەڕانەوەیە بۆ بەغدا

دوای كۆبونەوەی سەرۆكی پێنج فراكسیۆنە كوردییەكەی ئەنجومەنی نوێنەرانی عێراق ( پارتی دیموكراتی كوردستان، یەكێتی نیشتمانی كوردستان، بزووتنەوەی گۆڕان، یەكگرتووی ئیسلامی كوردستان و كۆمەڵی ئیسلامی كوردستان) كە بەسەرپەرشتی جێگری دووەمی سەرۆكی پەرلەمان ئارام شێخ محەمەد لە بارەگای مەكتەبی سیاسی یەكگرتووی ئیسلامی كوردستان لە شاری سلێمانی بەڕێوەچوو، لە كۆنگرەیەكی رۆژنامەوانیدا راگەیەندراوی كۆبونەوەكە و دواین هەڵوێستی لایەنە كوردییەكان لەسەر گەڕانەوە بۆ بەغدا خرایە ڕوو.

لە راگەیەندراوەكەدا كە لە كۆنگرە رۆژنامەوانییەکەدا خوێندرایەوە ، پێنج خاڵی لەخۆ گرت بوو كە بریتین لە:-

ـ فراكسیۆنە كوردستانییەكان بە گرنگی و هەستیارییەوە دەڕواننە دۆخی سیاسیی و ئابووری عێراق و هاوڕان لەسەر گرنگی سازدانی كۆبوونەوەی هاوبەشی پەرلەمانی عێراق بەو مەرجەی پێشوەخت ئامادەكاری تەواو و سازانی پێشوەخت لەنێوان فراكسیۆنەكانی پەرلەمان بكرێت.

ـ پێویستە سەرۆكوەزیرانی عێراق حەیدەر عەبادی گفتوگۆ و هەوڵەكانی لەگەڵ تێكڕای لایەنە سیاسییەكانی بەشداربووی حكوومەت چڕ بكاتەوە بۆ كۆتایهێنان بە كێشەی حكوومەت و كابینە وەزارییەكەی.

ـ عەبادی وەك فەرماندەی گشتیی هێزە چەكدارەكان و لێپرسراوانی تری ئەمنی و سەربازیی عێراق لە كۆنترۆڵكردنی ئاسایشی عێراق بە گشتی و بەغدا بە ئەركی خۆیان هەڵبستن.

ـ وەك فراكسیۆنە كوردستانییەكان جەخت دەكەینەوە لەو مەرجانەی كەلە سەرەتای دروستبوونی حكومەت لە وەرەقەی رێکكەوتنی سیاسیی فراكسۆنەكان بۆ پێكهێنانی كابینەی وەزاری پێشكەشی عەبادی كرا و لەسەر ئەو بنەمایە كورد بەشداری حكومەتەكەی كرد كە گرنگترینیان چارەسەری كێشەی خاك و بودجەی خەڵكی كوردستان و هاوكاری و پشتیوانی پێشمەرگە و چەندین مافی تری خەڵكی كوردستانی لەخۆگرتووە.

ـ فراكسیۆنە كوردستانییەكان ئامادەی تەواویی خۆیان بۆ هەموو گفتوگۆیەك لەگەڵ لایەنە سیاسییەكان دەردەبڕن بۆ گەیشتن بە ئاسۆی چارەسەرێك بۆ سەرجەم قەیران و كێشەكان.

سەرۆكی فراكسیۆنی یەكێتی نیشتمانی كوردستان ئاڵا تاڵەبانی لە كۆنگرەكەدا گوتی: "وەك لە راگەیەندراوەكەدا هاتووە ئێمە جەخت لەسەر كۆبوونەوەیەكی هاوبەش دەكەینەوە كە پێش كۆبوونەوەكە گشت لایەنەكان بگەنە رێكەوتن و ئیتیفاق و عەبادیش بە گفتوگۆ لەگەڵ لایەنەكان كێشەی كابینە وەزارییەكەی چارەسەر بكات".

تاڵەبانی گوتی: " ئەو مەرجانەی لە راگەیەندراوەكەدا هاتووە، مەرجی گەڕانەوەمانە بۆ بەغدا".

لەلای خۆیەوە سەرۆكی فراكسیۆنی گۆڕان هۆشیار عەبدوڵا گوتی: " داوامان لە حەیدەر عەبادی كردووە كە هەستێت بە بەرپرسیارێتی خۆی بۆ ئەوەی پێش هەر كۆبوونەوەیەكی پەرلەمان زەمینەیەك ساز بێت بۆ گەیشتن بە ئاسۆی تەوافوق و رێكەوتن، بەڵام وەك فراكسیۆنە كوردستانییەكان كۆمەڵێك داواكاری خەڵكی كوردستانمان هەیە كە گفتوگۆی لەسەر دەكەین و ئەگەر بەرچاومان روون نەبێت بەشداری كۆبوونەوەی پەرلەمان ناكەین".