سەرۆکایەتی هەرێمی کوردستان سەرپەرشتی دوو کۆبوونەوەی گرنگ دەکات

هەولێر - AA

سەرۆکایەتی هەرێمی کوردستان سەرپەرشتی دوو کۆبوونەوەی لووتکە دەکات و بە پێی زانیارییەکانی دۆخی عێراق و داهاتووی پەیوەندییەکانی نێوان هەرێمی کوردستان و بەغدا پرسی سەرەکی کۆبوونەوەکان دەبێت.

بەپێی زانیارییەکان لە یەکەم کۆبوونەوەدا هەر سێ سەرۆکایەتییەکەی هەرێمی کوردستان، نێچیرڤان بارزانی، سەرۆکوەزیران مەسرور بارزانی و سەرۆکی پەرلەمانی کوردستان رێواس فایق بەشدار دەبن.

لە کۆبوونەوەی دووهەمی سەرۆکایەتی هەرێمدا، هەر سێ سەرۆکایەتییەکە میوانداری سەرکۆماری عێراق بەرهەم ساڵح دەکەن و کەسی یەکەمی پارتە سیاسییەکانی هەرێمیش بەشدار دەبن.

بەرهەم ساڵح رۆژی رابردوو گەیشتە هەولێر و لە لایەن سەرۆکی هەرێمی کوردستان نێچیرڤان بارزانییەوە پێشوازی لێکرا.

دەگوترێ، لە ئەنجامی ناوەڕۆکی کۆبوونەوەکان، راگەیاندراوێک دەربکرێ و هەڵوێستی هەرێمی کوردستان لەسەر کۆی رووداوە سیاسییەکانی عێراق و بە تایبەت ئەگەری گۆڕانکاری لە دەستوور بۆ رای گشتی ئاشکرا بکرێ.