راگەیەندراوی لەندەنی ناتۆ بڵاوکرایەوە

لەندەن-AA

سەرکردەکانی وڵاتانی ئەندامی ناتۆ کە بەمەبەستی بەرزراگرتنی ٧٠ھەمین ساڵیادی ھاوپەیمانییەکە لە لەندەن کۆبوونەتەوە، راگەیەنراوێکی ھاوبەشیان بڵاوکردەوە.

لە راگەیەنراوەکەی لەندەندا باس لەوەکراوە، ناتۆ بەردەوامە لەوەی ئاسایشی ملیارێک مرۆڤ و خاکەکانیان دەستەبەر بکات و بنەماکانی "ھەماھەنگیی و یەکێتیی" بەردەوامن لەوەی بەردی بناغەی ھاوپەیمانییەکە بن.

ھەروەھا جەخت لە پەیوەندییە بەھێزەکانی نێوان ئەورووپا و ئەمریکا کە دەریای ئەتڵەسیی دەبڕن، کراوەتەوە و پابەندیی بەو بەڵێنەی لە ماددەی پێنجی رێککەوتننامەی واشنتۆندا ھاتووە، دووپاتکراوەتەوە کە تێیدا ھاتووە: "ھێرشی ئاڕاستەکراو بۆ سەر ھەر ھاوپەیمانێک، ھێرشە بۆ سەر ھەموومان".

- "خەرجییەکانی بەرگریی ماوەی پێنج ساڵە زیاد دەکەن"

لە راگەیەندراوە ھاوبەشەکەدا ھاتووە "ھەموومان سوورین لەسەر لەئەستۆگرتنی خەرجیی و لێپرسراوێتییەکانی ئاسایشی دابەشنەبوومان" و تیشکخراوەتە سەر ئەوەی سەرجەم ھاوپەیمانان لە چوارچێوەی بەڵێنەکانیان لە بواری بەرگرییدا، وەبەرھێنانیان لە پەرەپێدانی بەرگریی و تواناکاندا کردووە، و رۆڵیان لە ئەرک و ئۆپەراسیۆنەکاندا گێڕاوە.

ھەروەھا تێیدا ھاتووە: "ھاوپەیمانەکان جگە لە ئەمریکا ماوەی پێنج ساڵە خەرجییەکانی بەرگرییان زیاد دەکات. زیاتر لە ١٣٠ ملیار دۆلار وەبەرھێنان لە بواری بەرگرییدا ئەنجامدراوە" و لەو بوارەدا بەرەوپێشچوونی گرنگ تۆمارکراون.

- "تیرۆر بەردەوامە لەوەی ھەڕەشە بێت بۆ سەر ھەموومان"

لە راگەیەندراوەکەی لەندەندا ئاماژە بەوەکراوە "تیرۆر بە ھەموو جۆر و دەرکەوتەکانییەوە بەردەوامە لەوەی ھەڕەشە بێت بۆ سەر ھەموومان" و ھاوپەیمانان مکوڕن لەسەر بابەتی بەرەنگاربوونەوەی تیرۆر، و لەو چوارچێوەیەدا ھەنگاوی پتەوتریان پێکەوە ھاویشتووە.

تیشکخراوەتە سەر ئەوەش کە چالاکییە دوژمنکارانەکانی رووسیا بووەتە مایەی ھەڕەشە بۆ سەر ئاسایشی ئەورووپا-ئەتڵەسیی و ھاوپەیمانییەکە لەلایەن وڵاتان و کارەکتەرە نا دەوڵەتییەکانیش بەرەوڕووی ھەڕەشەی جۆراوجۆر بووەتەوە.

- "ناتۆ نابێتە مایەی ھەڕەشە بۆ سەر ھیچ وڵاتێک"

ھەروەھا لە راگەیەندراوەکەدا پێداگریی لەسەر ئەوە کراوە کە" ناتۆ ھاوپەیمانییەکە کە ئامانج لێی بەرگرییە و نابێتە مایەی ھەڕەشە بۆ سەر ھیچ وڵاتێک".

باس لەوەشکراوە لەئەنجامی ئەوەی کە رووسیا مووشەکی مامناوەند مەودای جێگیرکرد و کۆتایی بە رێکەوتننامەی ھێزە ئەتۆمییە مامناوەند مەوداکان ھات، رێکاری "رێژەیی و پێوانەکراو" ئامادەکراون و تێیدا ھاتووە: "تا ئەوکاتەی کە رەفتارەکانی رووسیا رێگەبدات، ئامادەییمان تێدایە بۆ دیالۆگ و پەیوەندییەکی بنیاتنەرانە".

لە راگەیەندراوەکەی لەندەندا ئاماژە بەوەشکراوە ھاوپەیمانییەکە ھاوکات بەمەبەستی پارێزگارییکردن لە سەربەخۆیی لە ئاسمان و دەریا، ھەوڵەکانی زیادکردوون و ناتۆ بەردەوامە لەوەی ھێزی بەرگریی و چاوسوورکردنەوە، لەرێگەی توانا نەریتیی و مووشەکی بەرگرییەوە، بەھێزبکات. تیشکخراوەتە سەر ئەوەش کە "تا ئەوکاتەی چەکە ناوەکییەکان ھەبن، ئەوا ناتۆش بەردەوام دەبێت لەوەی ھاوپەیمانییەکی ئەتۆمیی بێت".