جەعفەر ئێمینكی: "هەڵبژاردنی دەستەیەكی نوێ بۆ سەرۆكایەتی پەرلەمان زۆر پێویستە"

ئێمینكی دەڵێت ئەگەر هەرێمی کوردستان لەعێراقیش جیا ببێتەوە پردی پەیوەندییەكانی لەگەڵدا ناپچڕن، هەروەها بۆ زەمینەسازیی ئەو پرسەش لەگەڵ توركیا و ئێران دانوستانی جددی دەكرێت.
" دانووستان لەسەر هەڵبژاردنی دەستەیەكی نوێ بۆ سەرۆكایەتی پەرلەمان دەكەین"
جێگری سەرۆكی پەرلەمانی كوردستان جەعفەر ئێمینكی لە هەڤپەیڤینێكدا لەگەڵ ئاژانسی ئانادۆڵو دوایین هەڵوێستەكانی خۆی و حزبەكەشی لەبارەی پەرلەمانی كوردستان دەخاتەڕوو و لەم بارەیەوە دەڵێت: " ئێمەش بەو بارودۆخەی كە پەرلەمانی كوردستان پێیدا دەرباز دەبێت رازی نین، ئێمەش نیگەرانین و دەمانەوێت ئەو دۆخە زوو كۆتایی پێ بێت، دروستبوونی ئەم دۆخە بۆ پەرلەمان پەیوەست بوو بە پرۆسەی سیاسی، ئێستا چاوەڕوانی ئەوەین گەڕێكی دیكەی دانووستاندنی جددی تر لە جاران دەست پێ بكاتەوە كە بەرچاوڕوونییەكی باشتری پێوە دیار بێت و زەمینەسازییەكی زیاتری بۆ بكرێت تا بگاتە ئەنجام".

ئەو لە درێژەدا دەشڵێت: "مەرج نییە تا لایەنەكان نەگەنە رێككەوتن پەرلەمانی كوردستان كۆ نەبێتەوە، ئەو مەسەلەیە پەیوەستە بە گەڕی دانووستانەكان کە چۆن بەڕێوە دەچن، ئەگەر لایەنە سیاسییەكان بەشێوازێك لە شێوازەكان رێكنەكەوتن ئەوە رەنگە ئەو كاتە ئێمە لە پارتی دیموكراتی كوردستان بژاردەی دیكەمان هەبێت، رەنگە بیر لە كۆبوونەوەی پەرلەمان و لە دروستكردنی زۆرینەیەك لە نێو پەرلەمان بكەینەوە یان بەرەو بارودۆخێكی دیكە بچین".

ئێمینكی گەشبینی خۆی بۆ ئەگەری دەستپێكردنەوەی گفتوگۆكان و گەیشتنە چارەسەری دیكە ناشارێتەوە، هۆكارەكەشی بۆ ئەوە دەگەڕێنێتەوە وەكو خۆی دەڵێت "بارودۆخی ئەو ماوەیەی دوایی بۆ هەموو لایەك بەتایبەت بۆ بزووتنەوەی گۆڕان پەندی زۆری تێدابوو"، ئەو لەم بارەیەوە روونی دەكاتەوە کە "تەوافوق بۆ هەموو لایەك زۆر گرنگ بوو، بەتایبەت بۆ گۆڕان تایبەتمەندی و گرنگییەكی یەكجار زۆری هەبوو، چونكە ئەوان ماوەیەكی زۆر لە ئۆپۆزسیۆن بوون كە ئەزموونێك بوو، دیار بوو لێی بێزاربوون و پێیان باش نەبوو، پێشم وایە تێیدا سەركەوتووش نەبوون. راستە بۆ كۆمەڵگەی كوردستانی دیاردەیەكی نوێ بوو، بۆیە بە هاتنە ناوەوەیان بۆ حوكمڕانی و پەرلەمان بە پۆستەوە و بەوەشی كە یەكەم هێز بوون لەگەڵ پارتی دیموكراتی كوردستان شەراكەتیان قبووڵ كرد هەم لە رووی جەماوەریی و راگەیاندنیشەوە ئیمتیازیان وەرگرت، لە نێو پەرلەمان و حكوومەتیش پێگەیان بەهێز بوو، لەبەر ئەوە تەوافوق زۆر لە بەرەژەوەندیی ئەواندا بوو".

سەبارەت بەوەی كێ ئێستا سەرۆكی پەرلەمانە و ئەو پرسە چۆن چارەسەر دەكرێت ناوبراو رایدەگەیەنێت: "لە رووی فەرمییەوە هەتا سەرۆكێكی تر بۆ پەرلەمان هەڵدەبژێرین بەڕێز یوسف محەمەد سەرۆكی پەرلەمانە، بەڵام لێرە نییە، بۆیە كێشە هەیە. سەرۆكی كردەیی پەرلەمان غایبە ئێستا، لە نێو پارتی باس لەوە نەكراوە من ببمە سەرۆكی پەرلەمان و نە من ئەوەندە تموحی ئەوەم هەیە و نە پارتیشی ئەوەندە بە پەرۆشە بۆ ئەم مەسەلەیە بەڵكو دەمانەوێ هاوبەشی لە كوردستان بەردەوام بێت".

جەعفەر ئێمینكی هەڵبژاردنی دەستەیەكی نوێ بۆ سەرۆكایەتی پەرلەمان بە پێویست دەزانێت و رایدەگەیەنێت " ئێستا سەرۆكایەتی پەرلەمان كێشەی تێدایە، چونكە بۆشایی تێدایە، سەرۆكی پەرلەمان دەبێت لێرە دەوام بكات، كە لێرە دەوام ناكات واتە كێشەمان هەیە. راستە هەندێك لە كاروبارەكان من بەڕێوەیان دەبەم و هەندێك جار بە راوێژ لەگەڵ سكرتێری پەرلەمان دەبێت بەڵام ئەوە بەس نییە چونكە ئێمە ناتوانین دانیشتنە ئاساییەكان لەم دۆخەكەدا ئەنجام بدەین. ئەگەر بشتوانین پەنامان بۆ نەبردووە، لەبەر بار و پرۆسەی سیاسی بۆ ئەوەی دەرفەتی زیاتر بدەین. پێم وایە هەڵبژاردنی دەستەیەكی نوێ بۆ سەرۆكایەتی پەرلەمان كارێكی زۆرگرنگ و زۆریش پێویستە، ئەو هەنگاوەش لە دانوستانەكانماندا یەكێك دەبێت لە چارەسەرییەكان كە بە چارەسەرێكی باش دەبینین".

گوتیشی" دكتۆر یوسف ئەتوانێت وەكو ئەندامی پەرلەمان بێتەوە هەولێر و بەردەوام بێت".

" پشتگیری لە چاكسازییەكانی حكوومەت دەكەین"
دەربارەی ئەو چاكسازییانەی حكوومەتی هەرێمی كوردستان دەستی پێ كردووە، جێگری سەرۆكی پەرلەمانی كوردستان جەعفەر ئێمینكی دەڵێت: "ئەركی حكوومەتی هەرێمی كوردستانە ئەگەر تووشی قەیران بێت رێگەچارە بدۆزێتەوە، ئەوەی دەكرێت پشتگیری لێ دەكەین. ئەركی هەموومانە هاوكار بین بۆ سەرخستنی، ئەوەی گرنگە ئەمجارە حكوومەت خۆی دەستپێشخەریی بۆ چاكسازی كردووە وبە پێویستی زانیوە چونكە هیچ رێگەیەكی دیكەمان لەبەردەستدا نییە. هەنگاوی یەكەمی بریتییە لەوەی چۆن خەرجییەكان كەم بكەینەوە، كەمكردنەوەی زێدەڕۆیی خەرجییەكان و وەرگرتنەوەی قەرزەكان، بە پێویستی دەزانین لەگەڵ ئەو هەنگاوەی حكوومەت هەڵمەتی لێكتێگەیشتن و ئاگاداركردنەوەی رای گشتیی و هێزەکانی سیاسی لە وردەكاریی ئەو پرۆژە چاكسازییە بكەین، بۆ ئەوەی پشتگیری تەواوی لێ بكرێت".
جێگری سەرۆکی پەرلەمان دەشڵێت: "پەرلەمانی كوردستان پێشتر چەندین بیرۆكەی بۆ چاكسازیی داوەتە حكوومەتی هەرێم هەروەها لێكنزیكبوونێكی باش هەبوو لە نێوان حكوومەت و پەرلەمانی كوردستان و وەزیرە بەڕێزەكان دەهاتنە پەرلەمان و باسیان دەكرد چۆن چاكسازی بكرێت و لێژنەیی یاساییش لەو بارەیەوە بۆچوونی خۆی دەدا و ئەنجام حكوومەتی هەرێم كردی بە دیراسە و گەیشتە ئەو دەرەنجامە".

"دوایین دەرفەتمان لەگەڵ عێراقدا ماوە، ئێران پێش سعوودیە دان بە سەربەخۆییمان دەنێت"

سەبارەت بەو ریفراندۆمەی سەرۆكی هەرێمی كوردستان مەسعوود بارزانی چەند رۆژێك لەمەوبەر باسی لێوە كرد، جێگری سەرۆكی پەرلەمانی كوردستان جەعفەر ئێمینكی لەم هەڤپەیڤینەیدا لەگەڵ ئاژانسی ئانادۆڵو روونی دەكاتەوە "مافێكی دەستوورییە جەنابی سەرۆكی هەرێمی كوردستان داوا لە پەرلەمان و خەڵكی كوردستان بكات ئەو مافەی خۆیان بە بیری دونیا و بەغداش بهێننەوە و مومارەسەی بكەن، پێمان وایە ریفراندۆم مافی رەوای خۆمانە. ریفراندۆم لەسەر ئەو ناوچە كوردستانیانەی ماددەی 140 دیاری كردوون، لەسەر ئەوەی ئەگەر دۆخی هەرێم بەو شێوازەی ئێستای بڕوات و بەغدا خۆی بە بەرپرسیار نەزانێت بەرامبەر بە هێزی پێشمەرگە و چەك و بوودجە و راهێنانیشی ئیتر مانەوەی ئێمە لەگەڵ بەغدا هیچ مانایەكی نامێنێت".

جەعفەر ئێمینكی دەشڵێت: "بۆیە ئەوەی جەنابی سەرۆكی هەرێمی كوردستان باسی كردووە هەستكردنە بە بەرپرسیارێتی بەڕێوەبردن و سەركردایەتیكردنی هەرێمی كوردستان. ئێمە پشتگیری لێ دەكەین. پێشتر پەرلەمانی كوردستان هەموو ئامادەكارییەكی لە رووی یاساییەوە بۆ ئەو مەبەستە كردووە، یاسای كۆمیسیۆنی هەڵبژاردنەكان و ریفراندۆمی پەسەند كرد و دەستبەكاریش بوون، كۆمیسیۆنیش بۆ ریفراندۆمەكە ئامادەیی هەیە".

ئەو زانیاریی زیاتریش دەدات و دەڵێت: "بڕیارەكە ئەگەر بدرێت بۆ كات و بارودۆخێكی دیكەیە. باوەڕناكەم هیچ كەس و لایەنێكی سیاسی دوودڵی لەم بڕیارە هەبێ چونكە مافی خۆمانە و نابێت دوابكەوێت. مەرج نییە هەر هەمان رۆژی ریفراندۆم داوای جیابوونەوە و دەوڵەت بكەین، مەسەلەكە ئەوەیە ئێمە لەگەڵ بەغدا گرێبەستێكمان هەیە كە دەستوورە، بەغدا نەك ماددەكانی دەستووری پێشێل كردووە، مافەکانی سەرەتاییش پێشێل دەكات. بۆیە كە بەغدا ئەو دەستوورە جێبەجێی نەكات هەرێمی كوردستان مافی خۆیەتی چارەنووسی خۆی دیاری بكات. باوەڕناكەم دنیاش پەنا بردنی هەرێم بۆ ریفراندۆم و جیابوونەوەی بە ناهەق بزانن، من بۆ خۆم بە گونجاوی دەزانم ساڵی 2016 ریفراندۆم بكرێت".
سەرباری قسەكانی لەسەر جیابوونەوەی هەرێمی كوردستان لە عێراق ئیمنكی دەڵێت هێشتا دەرفەتی كۆتایی لەبەردەم فەرمانڕەواكانی عێراقدا ماوە وڵات بەیەكپارچەیی بهێڵنەوە، لەم باریەوە دەڵێت: "ئەگەر لە بەغدا ئیرادە هەبێت عێراق بە یەكگرتووی بهێڵنەوە و چازكسای بنەڕەتی لە عەقڵییەتدا بكەن هێشتا دەرفەت ماوە هەرێم لەگەڵ عێراق بمێنێتەوە. ئەو عەقڵەییەتەی زۆر جار ئەوەندە شۆڤینییە لە خۆیان زیاتر كەس نابینن. كورد بە هیچ شێوەیەك ناخوێننەوە و تایفەگەری بەسەر دامەزراوەكاندا وا زاڵە عێراقی یەكگرتوو بەو شێوازە بەڕێوە ناچێت، رەنگە دەرفەتی كۆتایی بەدەستی دەسەڵاتدارانی بەغداوە مابێت بۆ یەكپارچەیی عێراق، ئەگەر ئەوان هەنگاوی بەپەلەی جددی بهاوێژن هەرێمی كوردستان باشترین شەریكە بۆ ئەوەی سەقامگیری لە سەرتاسەری عێراق بەدەست بێت".
ئێمینكی هاوڕایە لەگەڵ ئەوەی پێ ناچێت ئەنجامدانی ریفراندۆم و راگەیاندنی جیابوونەوەی هەرێمی كوردستان لە عێراق ئاسان بێت، لەم بارەیەوە دەڵێت: "دەزانین ئەو كارە ئاسان نابێت بەڵام بەهەڵسەنگاندنی جاران بارودۆخەكە زۆر جیاوازە. ئەگەر پێشتر باسی ئەوەت كردبا بەغدا لەسێدارەی دەدای، لەگەڵ ئێران هەر قبووڵ نەدەكرای، توركیا ئەوەتا دەبینین ئێستا دۆخی نوێ هاتووەتە كایەوە و لە كۆشكی كۆماری بە ئاڵای كوردستانەوە پێشوازی لە سەرۆكی هەرێم دەكرێت، ئەوە گۆڕانكارییە لە عەقڵییەت و بارودۆخی سیاسی ناوچەكە. هەرێمی كوردستان توانیویەتی پەیامی باش بۆ لایەنەكانی ناوچەكە بنێرێت، تەنانەت لە بەغداش کەسانێکی ژیر هەن كە پێیان وایە ئەگەر مامەڵەی شەریك لەگەڵ هەرێمی كوردستان نەكەیت باشترە جیا ببێتەوە".
ئەو دەشڵێت: "ئەگەر هەرێمی كوردستان هەنگاوی وا بهاوێژێت هەڵبەت دەبێت زەمینەسازیی باشی دیپلۆماسیشی بۆ بكات، بەتایبەت لە بابەت توركیا و ئێرانەوە كە دراوسێی ئێمەن. هەرێمی كوردستان دەتوانێت ئەوكات ببێتە شەریكێكی باش لەگەڵ ئێران و توركیاش، چەند ساڵی رابردوو ئەوەی سەلماندووە دەتوانێت سنوورەكانی بپارێزێت و لە رووی سیاسی و دیپلۆماسییشەوە سەقامگیر بێت. ئەو هێزانەی كوردستانی ئێران كە چەكیان لەشان بوو لەبەر خاتری ئەوەی ئەزیەت بە هەرێمی كوردستان نەگەیەنرێت بۆ ماوەیەك وازیان لە چەك هێنا تا دەرفەتی زیاتر بە دیالۆگ لەگەڵ ئێران بدەن، لەگەڵ توركیا ئێستا رەوشەكە یەكجار بەرەوپێشەوە چووە و تەقەبولی هەرێمی كوردستان دەكات".

ناوبراو باس لەوەش دەكات كە كورد لە دوای 2003ەوە كاری باشی بۆ عێراق كرد، لەوانە تێپەڕاندنی دەستوور، بەڵام ئەوان هێشتا مامەڵەیان لەگەڵ هەرێم خراپە، جەعفەر ئێمینكی لە درێژەدا گوتی: "ئێمە پێمان وایە ئێرانیش بەچاوی رێزەوە تەماشای هەرێم بكات كە بارودۆخی خۆی بەڕێوە دەبات و باشتر باروردۆخی نێوخۆی بەڕێوە دەبات، ئێران ئەمە بەهەند وەردەگرێت. هەروەها هەرێمی كوردستان شەریكێكی زۆر كاریگەر و كردەییە بۆ توركیا هەم لە رووی دابینكردنی مافی نەتەوەكانی تر و هەم ئەزموونەكەش سەركەوتووە".

جێگری سەرۆكی پەرلەمان هێما بۆ ئەوەش دەكات كە ئەگەر مەسەلەی جیابوونەوە لە عێراق بگاتە دەستپێكردن لە توركیا و ئێرانەوە دەست پێ دەكەن و دانوستانی جددییان لەگەڵ دەكرێت، لەگەڵ عێراقیش بە قسەی ئەو پاش جیابوونەوەش پردی زۆر بۆ پەیوەندیی دەمێنێتەوە، دەشڵێت: "ئەگەر ریفراندۆم چارەسەر بێت، كۆمەڵگەی نێودەوڵەتیش پێشوازی لێ دەكات".

لەكۆتایی قسەكانیدا لەسەر پرسی ریفراندۆم و سەربەخۆیی كورد، جێگری سەرۆكی پەرلەمان جەعفەر ئێمینكی بۆ ئاژانسی ئانادۆڵو بەدووری نازانێت كە یەكێك لە ئامانجەكانی دروستكردنی داعش بۆ دواخستنی پرسی ریفراندۆمەكەی كورد بێت كە باس دەكرا لەوەی 2015 رابگەیەنرێت، لەو رووەشەوە دەڵێت: "داعش دیاردەیەكی تیرۆریستییە، دیاردەیەكی سیاسیشە بۆ تێكەڵكردنی كاغەزەكان لەم ناوچەیە. دروستكردنیشی چەند ئامانجێكی هەیە یەكەمیان ناشرینكردنی سوننە لەهەموو دونیا هەروەها پەلاماردانی كورد بۆ ئەوەی بێ ترس نەژین. ئەو ناوچانەی كە چالاكیشی لێ ئەنجام دەدەن ئەوانەن كە لە ئایندەدا پەیوەستن بە سایكس پیكۆوە، دروستكردنی داعش ئامانجی سیاسی لەپشتەوە بوو، ئامانجێكیشی پەلاماردانی هەرێمی كوردستان بوو".

ئەو بەرپرسەی هەرێمی كوردستان دەڵێت شوبهاندنی كوردستانیش بە ئیسرائیل بە دورست نازانێت، لەبارەی ئەو کەس و لایەنانەی ئەو قسانە دەكەن كە مەبەست لێی هەندێ دەنگ لە وڵاتانی عەرەبییە، زۆر شەفاف دەدوێت و دەڵێت: "ئەوان پەیوەندییان بە ئیسرائیلەوە هەیە و دراوسێی و خزمی یەكن، هەرێمی كوردستان سەلماندی دراوسێیەكی باشە و فاكتەری سەقامگیری و پاراستنی مافەكانی مرۆڤە، بۆ بە وڵاتانی وەكو سویسڕا لەمبارانەوە ناشوبهێندرێت، ئێمە پێمان وایە فاكتەری خێرین بۆ خۆمان و بۆ ناوچەكە و دونیاش".

ناوبراو لەبارەی هەڵوێستی عەربەكانیشەوە لەبارەی سەربەخۆیی هەرێمی كوردستانەوە دەڵێت: "پەیوەندییەكانی هەرێم و وڵاتانی عەرەبی باشە"، لەگەڵ ئەوەشدا پێی وایە "عەقڵییەتی عەرەبی لای ئاسان نییە دەوڵەتێكی كوردی قبووڵ بكات" كە ئەوەش بۆ "كەڵەكەبوونی مێژوویی" دەگەڕێنێتەوە.

جێگری سەرۆکی پەرلەمانی هەرێمی کوردستان دەڵێت: "ئەگەر دەوڵەتێكی كوردیش لەم ناوچەیە دروست ببێت پێشبینی دەكەم كە ئێران پێش سعوودیە دانی پێدا دەنێت، چونكە ئێمە دراوسێی ئێرانین و پەیوەندییەكی باشمان هەبووە و كاتی خۆی هاوكاریی ئێمەی كردووە و تا ئێستاش خوێندنەوەیەكی باشی بۆ هەرێم هەیە، رەنگە بۆ سعوودیە هێندەی ئێران ئاسان نەبێت".
"پەیوەندییمان لەگەڵ بەغدا زۆر كاڵ و لاوازە"
جێگری سەرۆكی پەرلەمانی كوردستان جەعفەر ئێمینكی لە درێژەی قسەكانیدا بۆ ئاژانسی ئانادۆڵو سەبارەت بەو خەندەقەشی كە ئێستا هەرێمی كوردستان سەرقاڵی لێدانیەتی لە ناوچە سنوورییەكانی دەڵێت خەندەقێكی سەربازییە و پێوستییەكی سەربازییە، دەشڵێت: "سنووری هەرێمی كوردستان بە خەندەق دیاری ناكرێت، دەتوانین بە ئاڵایەك دیاری بكەین. ئەگەر لە عێراقیش جیا ببینەوە ئەوەندە پرد دروست دەكەین هاووڵاتییەكی بەسڕاش، هەرێمی كوردستان بە ئاسانی بێتە هەرێم. واتە پەیوەندیی لەگەڵ عێراق ناپچڕین ئەگەر دوای سەربەخۆییش بێت".

لەبارەی پەیوەندییەكانی هەرێم و بەغداشەوە بە نیگەرانییەوە دەڵێت: "ئێستا پەیوەندییمان لەگەڵ بەغدا زۆر كاڵ و لاوازە، رەنگە تەلەفۆن هەبێت بەڵام ئەو پەیوەندییە گەرمە نییە. زەحمەتە لە وڵاتێك بژیت بەغدا بیر لە هەموو پێویستییەكانی حەشدی شەعبی بكاتەوە و هیچ پێویستییەكی پێشمەرگە نەگرێتە ئەستۆ، ئەوە شەراكەتە؟".

دەربارەی ئەگەری كشانەوەی كوردیش لە پرۆسەی سیاسی لە عێراق و كشانەوەی وەزیر و پەرلەمانتارەكانی رایدەگەیەنێت: "كشانەوەی وەزیر و پەرلەمانتارەكان بۆ ئەوم قۆناغە وارید نییە، تا دواین كات واز لە بەغدا ناهێنین. ئەگەر هەستمان كرد هەبوونی ئێمە لە بەغدا مایەی بێزاری خەڵكێكە و بەبارگرانی دەمانزانن ئەوكات بڕیاری خۆمان دەدەین. ئێستا بەشێوەیەكی بەرفراوان لەسەر ناسنامە پەلاماری كورد دەدرێت. لەسەر ئاستی دامەزراوەكانیش بێ رێزی بەرامبەر بە كورد دەكرێت و هەڕەشە دەكرێت، ئەگەر درێژە بكێشێت ئەوكات ناچارین ئەوانەی لە بەغدان، بیانپارێزین".

"كورد لە كەمی ئەو چەكانەی بەدەستی دەگات نیگەرانە"
ئیمنكی دەشڵێت كورد پێگەیەكی گرنگی لە هاوپەیمانی دژی داعش هەیە و ئەركی هەرە قورس لە زەمیندا لەسەر كوردە و بە شانازیشی دەزانێت، خۆشحاڵیی هەرێمی كوردستانیش لە هێرشەكانی رووسیا بۆ سەر داعش دەردەبڕێت.


ناوبراو نیگەرانیی سەركردایەتی هەرێمی كوردستانیش ناشارێتەوە لە نەگەیشتنی چەك لەلایەن هاوپەیمانانەوە وەكو پێویست و لەم رووەوە دەڵێت: "ئەو گلەییەمان هێشتا بەردەوامە، نەك گلەیی بەتەنها ئێستا گەیشتووەتە نیگەرانی، كە باری هەرێمی كوردستان لە رووی داراییەوە قورسە و نرخی نەوت دابەزیوە و دەزگای وا بەهێزمان نییە پاشخانی دراوی قورس و زێڕێكی وامان نییە بتوانین تەحەمولی نیوەی بوودجەی شەڕی داعش بكەین، دەبێت وڵاتانی هاوپەیمانان لە خەرجییەكانی جەنگی دژی داعش هاوكار بن، راستە چەك هاتوون و كاریگەرن بەڵام وەكو پێویست نین، ئومێد دەكەین ئەمساڵ وەرچەرخانێك لە رووی مەیدانەوە لەوبارەیەوە هەبێت، من گەشبینم كە ئەوە ببێت چونكە زۆر لە وڵاتان متمانەیان بەوە نییە چەك لە رێگەی بەغداوە بنێرن، لەوە دەترسن ئەو چەكە بكەوێتە دەستی خەڵكی تر".

لەكۆتایی قسەكانیدا بۆ ئاژانسی ئانادۆڵو جێگری سەرۆكی پەرلەمانی كوردستان د.جەعفەر ئێمینكی تیشك دەخاتەسەر رووداوەكانی نێوخۆی توركیا و دەڵێت: "ئێمە بە دووبارە دەستپێكردنەوەی شەڕ و بوونی ئەو قوربانییە زۆرە لە هەردوولا خەمبارین، پێویست نەبوو ئەو خوێنە بڕژێت، ئێمە بەتەواوەتی دژی ئەو شەڕەین. خۆشحاڵیشین ئەو شەڕە زوو تەواو ببێت ئەمڕۆ پێش سبەینێ. ئەوە بۆچوونی ئێمەیە لە پەرلەمانی كوردستان و پارتی دیموكراتی كوردستانیش، وا دەبینیین جارێكی دیكە دەرفەت بە ئاشتی و چارەسەری دیموكراتی بدرێتەوە، لە توركیا دەرفەتێكی وا هەیە و لەبارە، راستە قوربانییەكانی شەڕەكانی ئەمجارە زۆرن بەڵام دەبێت بگەڕێنەوە بۆ دانوستان و لایەنە سەرەكییەكانی توركیا پڕۆژەیان هەبێت، ئەگەر داوا لە سەرۆكی هەرێمیش بكرێت دەبێتە بابەتێكی تر، بەگشتیی هەرێمی كوردستان بە هەموو شێوەیەك پشتگری ئەوە دەكات، ئەو پرۆژەیە سەربگرێت".