بارزانی: "ھێزی پێشمەرگە بەشداری شەڕی ئازادکردنی مووسڵ دەبێت"

هەولێر -AA
لە پەیامێکدا بەبۆنەی دەستپێکردنی ئۆپەراسیۆنی کۆنتڕۆڵکردنەوەی مووسڵ، سەرۆکی هەرێمی کوردستان، مەسعود بارزانی رایگەیاند "لەو ئۆپەراسیۆنەدا پێشمەرگە یەکڕیز و یەکدەنگ بە بێ جیاوازیی حزبی و ناوچەیی بەشدار دەبێت و ئەرک و کاری سەربازیی ھەموو لایەک دیاریکراوە. ھەموو پێشمەرگەیەک کوڕ و برا و ئازیزی منن و کەسوکار و برا و پشت و پەنای یەکترن".
بە پێی ھەوالێکی مالپەری سەرۆکایەتی ھەرێمی کوردستان، سەرۆکی هەرێمی کوردستان، مەسعود بارزانی پەیامێکی بڵاوکردەوە و تیایدا ھاتووە: "لە ماوەی دووساڵی ڕابردوودا گەلی کوردستان خۆڕاگر بوو و پێشمەرگە بە قارەمانێتیی خۆی ئەفسانەی داعشی شکاند. ئێستا شەڕی دژی تیرۆریستان لە قۆناغێکی یەکلاییکەرەوەدایە و ھێزی پێشمەرگە بە ھەماھەنگی لەگەڵ ھێزەکانی سوپای عێراقی بەشداری شەڕی ئازادکردنی مووسڵ دەبێت".
لە پەیامەکەی بارزانی دا ھاتووە: "لەو ئۆپەراسیۆنەدا پێشمەرگە یەکڕیز و یەکدەنگ بە بێ جیاوازیی حزبی و ناوچەیی بەشدار دەبێت و ئەرک و کاری سەربازیی ھەموو لایەک دیاریکراوە. ھەموو پێشمەرگەیەک کوڕ و برا و ئازیزی منن و کەسوکار و برا و پشت و پەنای یەکترن".
سەرۆکی هەرێمی کوردستان داوا لە دەزگاکانی راگەیاندن دەکات جیاوازی و موزایەداتی حزبی نەخنە ناو ڕیزەکانی پێشمەرگە و دەڵێت: "داوا لە ھەموو لایەنەکان و بەرپرسان و ڕاگەیاندنەکان دەکەم جیاوازی و موزایەداتی حزبی نەخنە ناو ڕیزەکانی پێشمەرگە، پێشمەرگە، پێشمەرگەی ھەموو کوردستانە و سەرکەوتنی پێشمەرگە سەرکەوتنی ھەموو کوردستانییەکە".
ھەروەھا لە پەیامی سەرۆکی ھەرێمی کوردستان دا ھاتووە: "لە ماوەی بەڕێوەچوونی ئۆپەراسیۆنی ئازادکردنی مووسڵ ھەر کەس یان بەرپرسێکی سەربازی، سەر بە ھەر لایەنێک بێ ئەگەر دوور لە گیانی نیشتمانی و پێشمەرگایەتی بێت و حزبیانە بجووڵێتەوە، پێویستە وەزارەتی پێشمەرگە ئیجرائاتی لەگەڵدا بکات و لە بەرەکانی شەڕ دووری بخاتەوە. کەناڵ و دەزگاکانی ڕاگەیاندنیش سەر بە ھەر لایەنێک بن ئەگەر لە پۆششدانی ھەواڵی شەڕەکان لەبری خزمەتکردنی کوردستان و پێشمەرگە بکەونە موزایەداتی حزبی ئەوە لە بەرەکانی شەڕ دوور دەخرێنەوە و ڕووبەڕووی یاسا دەبنەوە".
لە کۆتایی پەیامی سەرۆکی ھەرێمی کوردستان، مەسعود بارزانی دا ھاتووە: "لە خودای مەزن داواکارم کە پێشمەرگە لەو جەنگەدا سەرکەوتوو بێت و داوایش لە خەڵکی سەربەرزی کوردستان دەکەم وەک ھەموو جار پشتیوانی پێشمەرگە بن".