ئایدن مەعروف: "ئامانجی ھێرشەکەی سەر ھەولێر ناسەقامگیرکردنی ناوچەکەیە"

ھەولێر ــ AA

وەزیری ھەرێم بۆ کاروباری پێکھاتەکان، ئایدن مەعروف ئیدانەی ھێرشەکەی شەوی رابردووی سەر ھەولێری کرد و رایگەیاند کە ئامانجی ئەو ھێرشانە بەئامانجگرتنی ھاووڵاتییانی مەدەنی و ناسەقامگیرکردنی ناوچەکەیە.

ئایدن مەعروف تویتێکی لەبارەی ھێرشەکەی شەوی رابردووی سەر شاری ھەولێری بڵاوکردەوە و تیایدا نووسیوویەتی: "بەتوندی ئیدانەی ئەو ھێرشە تیرۆریستییە دەکەین کە شەوی رابردوو کرایە سەر ھەولێر".

راشیگەیاندووە "ئامانجی ئەو ھێرشانە بەئامانجگرتنی ھاووڵاتییانی مەدەنی و ناسەقامگیرکردنی ناوچەکەیە، ھەروەھا ھیوای چاکبوونەوەیەکی بەپەلە بۆ ئەو ھاوڵاتییانە دەخوازین کە لە ھێرشەکەدا بریندار بوون".

شەوی رابردوو تەقینەوەیەک لە ھەولێر روویداوە و بە گوێرەی راگەیەندراوێکی دژەتیرۆری ھەرێمی کوردستان، درۆنێکی بۆمبڕێژکراو لەسەر رێگای پیرمام-ھەولێردا تەقییەوەتەوە و لە ئاکامدا سێ ھاووڵاتی برینداربوون، زیانی ماددیش بەر خواردنگەیەک و ژمارەیەک ئۆتۆمبێل کەوتووە.