گڕکانی ئیبو لە ئیندۆنێزیا تەقییەوە

ئەنقەرە - AA

گڕکانی ئیبو لە ویلایەتی مالوکوی باکوور لە ئیندۆنێزیا تەقییەوە، لە ئەنجامدا هەوری خۆڵەمێش لە ئاسمانی ناوچەکەدا بڵاوبوویەوە.

محەمەد وافید، کە یەکێکە لە بەرپرسانی فەرمانگەی کەشناسی ئیندۆنێزیا، لە لێدوانێکیدا بۆ ئانترا نیوز ئاماژەی بەوە کرد کە تەقینەوە لە گڕکانی ئیبو لە ڕۆژهەلاتی دوورگەی هاڵماهیرای سەربە ویلایەتی مالوکوی باکوور ڕوویداوە.

وافید باسی لەوە کرد کە لە کاتی تەقینەوەکەدا گڕکانەکە گڕی دەرداوە و خۆڵەمێشی گڕکانەکە گەیشتووەتە گوندەکانی دەوروبەری.

هەروەها وافید دانیشتوانی ناوچەکەی ئاگادار کردەوە لە مەودای چوار کیلۆمەتر لە گڕکانەکە نزیک نەبنەوە و، ئامۆژگاریشی کردن کە ئەو کەسانەی دەچنە دەرەوە دەمامک و چاویلکە ببەستن.

وافید ئەوەیشی خستەڕوو کە لە سەرەتای ٢٠٢٤ەوە نزیکەی ٩٥ جار گڕکانی ئیبو تەقیوەتەوە و، لە ١٦ی ئایاریشەوە تا ئێستا لە بەرزترین ئاستدابووە بۆ تەقینەوە.