کۆرۆنا.. نەتەوە یەکگرتووەکان داوای ٢١١ ملیۆن دۆلار بۆ سووریا دەکات

نەتەوە یەکگرتووەکان- AA

رێکخراوی نەتەوە یەکگرتووەکان داوای ٢١١ ملیۆن دۆلار یارمەتی بۆ سووریا دەکات.

یاریدەدەری سکرتێری گشتیی و بەرپرس لە هاوکارییە مرۆییەکانی نەتەوەیەکگرتووەکان، مارک لۆوکۆک لە لێدوانێکیدا بۆ ئەنجوومەنی ئاسایشی نەتەوە یەکگرتووەکان رایگەیاند "٢١١ ملیۆن دۆلار بۆ دابینکردنی پێداویستییە تەندروستییەکانی سووریا، چاککردنی تۆڕی دابەشکردنی ئاو، خاوێنی کەمپەکانی پەنابەران و دابینکردنی ئاسایش بۆ گەڕانەوەی قوتابییان و مامۆستاکان بۆ قوتابخانەکان، پێویستە."

مارک لۆوکۆک ئەوەشی ئاشکرا کرد لەسەدا ٩٢ی حاڵەتەکانی تووشبوون بە کۆرۆنا لە سووریا شوێنەوارەکانیان دیار نییە و هاوشێوەی زۆر وڵاتی دیکە، دەشێت ئاستی بڵاوبوونەوەی ڤایرۆسەکە لەو وڵاتەش زۆر لەوە گەورەتر بێت.

ناوبراو باسی لەوەش کرد ژمارەی حاڵەتە تۆمارکراوەکانی کۆرۆنا لە سووریا نزیکەی ١٣ هەزار و ٥٠٠ حاڵەتە.