چوارەم کۆبوونەوەی لیژنەی ئابووری ھاوبەشی نێوان ئێران و عێراق

ھەولێر ــ AA

ئەمڕۆ سێشەممە کارەکانی چوارەم کۆبوونەوەی لیژنەی ھاوبەش بۆ پەرەپێدانی ھاوکاری ئابووریی و بازرگانیی نێوان ئێران و عێراق لە تاران دەستی پێکرد کە بۆ ماوەی دوو رۆژ بەردەوام دەبێت.

شاندی ئابووری و بازرگانیی عێراق بەسەرۆکایەتی وەزیری بازرگانی، عەلا ئەحمەد جبوری کە دوێنێ دووشەممە گەیشتە تاران، بەشداریی چوارەم کۆبوونەوەی لیژنەی ھاوبەش بۆ پەرەپێدانی ھاوکاری ئابووریی و بازرگانیی نێوان ئێران و عێراق دەکەن.

ھەروەھا سەرۆکەکانی ژووری بازرگانیی و سەرۆکی یەکێتیی ژووری بازرگانیی عێراق، عەبدولرەزاق زوھێری لەگەڵ ژمارەیەک بەرپرسی باڵای دیکەی عێراق لە چوارەم کۆبوونەوەی لیژنەی ھاوبەش بۆ پەرەپێدانی ھاوکاری ئابووریی و بازرگانیی نێوان ئێران و عێراق بەشدارن.

لەم کۆبوونەوەیەدا، گفتوگۆکان تایبەت دەبن بە چۆنیەتی پەرەپێدانی زیاتر بە پەیوەندی ئابووری و ئاڵوگۆڕی بازرگانی لە نێوان عێراق و ئێران، جگە لەوەیش ھەڵسەنگاندن بۆ بازاڕەکانی ھەردوو وڵات لە بەرھەمی خۆماڵی دەکرێت.

عێراق و ئێران لیژنەیەکی ھاوبەشیان بە ئامانجی پەرەپێدانی ھاوکاری لە بوارەکانی ئابووریی و بازرگانیی پێکھێناوە و دوایین کۆبوونەوەی لیژنەکەیش لە تشرینی یەکەمی ساڵی رابردوو سازکرابوو.