پەیامی شازادەی جێنشینی سعوودیە بۆ ئەمریکا لەبارەی سووریا

واشنتۆن - AA

شازادەی جێنشینی سعوودیە، محەمەد بن سەلمان، لە لێدوانێکیدا بۆ راگەیاندنەکانی ئەمریکا رایگه‌یاند: "پێمانوایە سەربازانی ئەمریکا ئەگەر بۆ کاتێکی درێژیش نەبێ پێویستە بۆ کاتێکی مامناوەند لە سووریا بمێننەوە".

شازادەی جێنشینی سعوودیە، لە لێدوانێکیدا بۆ گۆڤاری Time ھەڵسەنگاندنی بۆ لێدوانەکەی سەرۆکی ئەمریکا، دۆناڵد ترەمپ کرد کە رایگەیاندبوو "لە کاتێکی نزیکدا سەربازانی ئەمریکا لە سووریا دەکشێنەوە".

شازادە سەلمان باسی لەوە کرد کە سەربازانی ئەمریکا دوا وێستگەی راگرتنی ئێرانن لە سووریا و، تەنیا بەم رێگایە دەتوانرێ رێگری لە ھەژموونی ئێران بگیرێ لە ناوچەکە.

گوتیشی: "پێمانوایە سەربازانی ئەمریکا ئەگەر بۆ کاتێکی درێژیش نەبێ پێویستە بۆ کاتێکی مامناوەند لە سووریادا بمێنەوە. بوونی ھێزی ئەمریکا لە سووریا، رێگە بە واشنتۆن دەدات ببێتە خاوەن قسە لەسەر داھاتووی ئەو وڵاتە (سووریا)".

سەلمان ئەوەشی خسته‌ڕوو کە ئێران دەیەوێ لە رێگەی ملیشیاکانەوە ھەژموونی خۆی لە بەیروت تا تاران بەسەر سووریا و عێراق بسەپێنێ و، گوتی: "ئەگەر سەربازەکانتان لە سووریا بکشێنەوە، ئەوا ئەو خاڵانەی کۆنترۆڵتانکردوون لەدەستی دەدەن و، دەبێتە ھۆکاری سەرھەڵدانی چەندین رووداوی جیا لە ناوچە ئارامه‌كان".

سەرۆکی ئەمریکا، دۆناڵد ترەمپ رۆژی پێنجشەممەی رابردوو لە ویلایەتی ئۆھایۆ لە کۆبوونەوەیەکی جەماوەریدا رایگەیاندبوو کە لە کاتێکی نزیکدا ھێزەکانیان لە سووریا دەکشێنەوە.

لای خۆشیه‌وه‌، گوتەبێژی وەزارەتی دەرەوەی ئەمریکا، ھێزەر ناوێرت رایگەیاندبوو کە ئەو ئاگەداری پلانی کشانەوەی ھێزەکانی ئەمریکا نییه‌ لە سووریا.

بەپێی ھەواڵێکی دوێنێی رۆژنامەی Wall Street Journal ئەمریکی، سەرۆکی ئەمریکا، دۆناڵد ترەمپ فەرمانی بە وەزارەتی دەرەوەی وڵاتەکەی کردووە کە پێدانی بڕی ھاوکاری ٢٠٠ ملیۆن دۆلار ھەڵپەسێرێت کە بۆ بونیاتنانەوەی ناوچەکانی ژێر کۆنترۆڵی رێکخراوی تیرۆریستی یەپەگە/پەیەدە لە سووریا تەرخانکرابوو.