پەلامارەکەی پاریس

دوای ئەوەی پۆلیسی فەڕەنسا شوێنی دوو لە ئەنجامدەرانی زنجیرە پەلامارەکەی پاریس-یان زانی، دەستبەجێ ئۆپەراسیۆنێک بۆسەر ماڵی گومانلێکراوەکان لە ناوچەی ساینت دەنیز ئەنجام درا.

لە کاتەکانی بەرەبەیاندا تیمی دژە تیرۆر لە پۆلیسی فەڕەنسا ئۆپەراسیۆنێکیان بۆسەر ماڵێک ئەنجامدا و لە ئاکامدا پێکدادان لە نێوان هێزەکانی پۆلیس و دوو گومان لێکراوەکە روویدا.

ئۆپەراسیۆنەکە کە بە پاڵپشتی هەلیکۆپتەرەوە ئەنجام درا تێدا داوا لە هاووڵاتیانی ناوچەکە کرا لە ماڵەکانی خۆیان نەیەنە دەرەوە و دەرگاکانیان دابخەن.

بەهۆی پێکدادانەوە دوو پۆلیس بریندار بوون و تیرۆریستێک دەستگیر کراو تیرۆریستێکی ئافرەتیش کوژرا.

بە گوتەی شایەتحاڵان تیرۆریستە ئافرەتەکە خۆی تەقاندووەتەوە.

هێزەکانی ئاسایش رایدەگەیەننن کە "ئەو گومانلێکراوەی دەستگیرکراوە ناوی عەبدولحەمید ئەباعۆدە و ئەو بووە کەوا فەرمانی تەقینەوەکانی پاریسی داوە".

لە ١٣ ی ئەم مانگەدا زنجیرە هێرشێک کرایەسەر پاریسی پایتەختی فەڕەنسا و بەهۆیەوە ١٢٩ کەس گیانیان لەدەست دا و ٣٥٢ کەسی تریش بریندار بوون و پاشان رێکخراوی تیرۆریستی داعش هێرشەکەی لە ئەستۆ گرت.