مێرکل: "هێزمان لە یەکبوونە"

راوێژکاری ئەڵمانیا ئەنگێلا مێرکڵ لەبارەی پەلامارەکانی برۆکسل گوتی: "ترسی تیرۆر هەرچەند بێ سنوور بێت، سەرکەوتن بەسەریدا بەهەمان شێوەیە".

لە راگەیەنراوێکیدا راوێژکاری ئەڵمانیا ئەنگێلا مێرکڵ، نیگەرانی خۆی نیشان دا بۆ پەلامارەکانی دوێنێی برۆکسل و ئیدانەی کرد.

ناوبراو جەختی کردەوە لەوەی کە پەیوەندی بە سەرۆکوەزیرانی بەلجیکا چارلس میشیلەوە کردووە و پێی راگەیاندوە کەوا حکوومەت و گەلی ئەڵمانیا هاوسۆزە لەگەڵ بەلجیکا و هاوکات ئامادەیی وڵاتەکەشی نیشان داوە بۆ هەر یارمەتییەک کە پێویست بکات.

مێرکڵ گوتی: "لەگەڵ حکوومەت و هێزە ئەمنییەکانی بەلجیکا لە هەماهەنگیدا دەبین بۆ ئەوەی تاوانباران دەستگیر بکەین و بە سزای خۆیان بگەیەنن".

ئەنگێلا مێرکڵ تیشکی خستە سەرئەوەی کە سەرەڕای ئەوەی هەموو یەکەکانی حکوومەت لەژێر هەڕەشەدان بەڵام بۆ پاراستنی وڵاتەکەی ئەوەی لە دەستیان بێت ئەنجامی دەدەن و گوتی: " بکوژەکانی برۆکسل تیرۆرستانێکن کە رێز لە بەهاکانی مرۆڤایەتی ناگرن".

راوێژکاری ئەڵمانیا گوتی: "ئەوانەی هێرشیان کردۆتە سەر بەلجیکا وەک ئەوە وایە کە هێرشیان کردبێتە سەر ئەورووپا، لەبەر ئەوەی بەلجیکا ئەندامێکی چالاکی یەکێتی ئەورووپایە".

ناوبراو گوتیشی: "ئێمە هێزمان لە یەکبوونە، دەبێت بە یەکەوە هەوڵ بدەین، بەو شێوەیە دەتوانین تیرۆر لە خاکەکانمان دەربکەین".