لە سوودان سوپا دەستی گرت بەسەر دەسەڵاتدا

خەرتوم - AA

وەزیری بەرگری سوودان، عەوەز بن عۆف رایگەیاند کە سوپا دەستیگرتووە بەسەر دەسەڵاتی وڵاتەکەدا و قۆناغی راگوزەری دوو ساڵەیی دەستیپێکردووە.

عەوەز بن عۆف لە راگەیەندراوێکدا کە لە تەلەڤیزیۆنی فەرمی سوودان بڵاوبوویەوە، ئاماژەی بەوەدا کە ئەنجوومەنی سەربازیی باڵا دەستیگرتووە بەسەر ئیدارەی وڵاتدا و سەرکۆمار، عومەر بەشیر دەستگیرکراوە.

وەزیری بەرگری سوودان ئاماژەی بەوەدا کە دەستووری وڵات هەڵپەسێردراوە و ئیدارەی سەرۆکایەتی وەزیران، ئەنجوومەن و پارێزگاکان هەڵوەشێندراونەتەوە و بۆ ماوەی دوو ساڵ قۆناغی کاتیی راگوزەر دەستیپێکردووە.

عەوەز بن عۆف دووپاتیکردەوە کە بارودۆخی نائاسایی بۆ ماوەی سێ مانگ راگەیەندراوە و لە تەواوی وڵاتدا بۆ ماوەی یەک مانگ لە دوای کاتژمێر١٩:٠٠ەوە چوونە دەرەوە قەدەغە دەکرێت.

وەزیری بەرگری سوودان، عەوەز بن عۆف بەڵێنی ئەوەی دا کە لەدوای قۆناغی راگوزەردا کار دەکرێت بۆ ئەنجامدانی هەڵبژاردن و رادەستکردنی دەسەڵات بە شێوەیەکی ئاشتییانە و زەمینەسازی بۆ ئەو دۆخە دەکەن.