واشنتۆن - AA

وەزیری دەرەوەی ئەمریکا، ئەنتۆنی بلینکن لە میانی کۆبوونەوەی گفتوگۆی ستراتیجیی ئەمریکا-کوێت کە ئەمساڵ پێنجەم کۆبوونەوەی رێکخرا لە واشنتۆن پێشوازیی لە هاوتا کوێتییەکەی، ئەحمەد ناسر محەمەد سەباح کرد.

ئەنتۆنی بلینکن لە کۆنگرەیەکی رۆژنامەوانیی هاوبەشدا لە وەزارەتی دەرەوەی ئەمریکا ئاشکرای کرد کە شاندی هەردوو وڵات لە میانی ئەم هەفتەیەدا، بەچڕی لە بارەی پەیوەندییەکانی ئەمریکا-کوێت و پرسە ناوچەییەکان گفتوگۆ دەکەن.

وەزیری دەرەوەی ئەمریکا ئاماژەی بەوەیش دا کە کوێت میوانداریی هەزاران پەنابەر دەکات کە لە ئەفغانستانەوە گواستراونەتەوە و ئەو وڵاتە لە قەیرانی یەمەن و قەیرانەکانی کەنداویشدا هەمیشە لایەنگری ئاشتیی و سەقامگیریی بووە.

ئەنتۆنی بلینکن ئاماژەی بەوەیش دا کە دەربارەی کێشەی فەڵەستین-ئیسرائیل گفتوگۆیان کردووە و گوتی: "سوپاسی وەزیری دەرەوەی کوێت-م کرد لە بەرامبەر سووربوونی وڵاتەکەی لەسەر دابینکردنی پێداویستییەکانی گەلی فەڵەستین و هاوکارییە داراییەکان بۆ حکوومەتی فەڵەستین".

لای خۆشییەوە وەزیری دەرەوەی کوێت، ئەحمەد ناسر محەمەد سەباح لە میانی کۆنگرە رۆژنامەوانییە هاوبەشەکەدا گوتی: "کوێت و ئەمریکا، هەماهەنگییەکی پتەویان هەیە و دوو دۆستی نایابی یەکترن. لەڕووی مێژووییەوە هاوپەیمانێتییەکی دێرینیان هەیە و ستایشی هەوڵە جیددییەکانی ئەمریکا لە پێناو پاراستنی ئاسایش و ئاشتی ناوچەکەدا دەکەین".