سەرۆکی حکوومەتی ھەرێمی کوردستان پێشوازی لە بریکاری وەزیری بەرگریی ئەمریکا دەکات

ھەولێر ـ AA

ئەمڕۆ دووشەممە، سەرۆکی حکوومەتی ھەرێمی کوردستان، مەسرور بارزانی پێشوازی لە بریکاری وەزیری بەرگریی ئەمەریکا بۆ کاروباری سیاسی، جۆن روود کرد.

بەگوێرەی ھەواڵێکی ماڵپەڕی حکوومەتی ھەرێم، لە دیدارەکەدا کە وەزیری پێشمەرگە، شۆڕش ئیسماعیل و وەزیری ناوخۆ، رێبەر ئەحمەد ئامادەی بوون ، بریکاری وەزیری بەرگریی ئەمەریکا پابەندبوونی ئەمەریکای بە پشتگیریکردنی ھەرێمی کوردستان دووپات کردەوە، ئاماژەی بەوەشکرد کە سەردانی جێگری سەرۆکی ئەمەریکا، مایک پێنس بۆ ھەولێر دووپاتکردنەوەی ئەو پشتیوانییەی ئەمەریکا بوو بۆ ھەرێمی کوردستان .

بریکاری وەزیری بەرگریی ئەمەریکا ھەروەھا جەختی لە بەردەوامیدان بە یارمەتیدانی ھێزی پێشمەرگە و گرنگی بەردەوامبوونی ھەماھەنگی لە نێوان پێشمەرگە و ھێزەکانی عیراقی کردەوە بۆ رووبەڕووبوونەوەی ھەڕەشەکانی داعش .

لەبەرامبەردا سەرۆکی حکوومەتی ھەرێمی کوردستان سوپاسی پشتیوانی ئەمەریکای کرد و دووپاتی کردەوە کە ھەرێمی کوردستان وەک فاکتەرێکی سەقامگیربوونی ئاسایش لە ناوچەکەدا رۆڵی خۆی دەگێڕێت .