سەرۆکوەزیرانی عێراق لەگەڵ وەزیری بەرگریی ئەمریکا کۆبووەوە

ھەولێر - AA

سەرۆکوەزیرانی عێراق، محەمەد شیاع سوودانی لە میانی کۆبوونەوەی لەگەڵ وەزیری بەرگریی ئەمریکا، ڵۆید ئۆستن پەرۆشی حکوومەتەکەی بۆ پتەوترکردنی پەیوەندییەکان لەگەڵ ویلایەتە یەکگرتووەکانی ئەمریکا لەسەرجەم بوارەکاندا نیشان دا و رایگەیاند کە سەقامگیریی عێراق، کلیلی ئاسایش و سەقامگیریی ناوچەکەیە.

نووسینگەی راگەیاندنی سەرۆکوەزیرانی عێراق لە راگەیەندراوێکدا ئاماژەی بەوەداوە کە محەمەد شیاع سوودانی پێشوازیی کردووە لە وەزیری بەرگریی ئەمریکا، ڵۆید ئۆستن و شاندی یاوەری.

لە میانی کۆبوونەوکەدا، ھاوکارییە ھاوبەشەکانی نێوان عێراق و ویلایەتە یەکگرتووەکانی ئەمریکا، رۆڵی ھێزە ئەمنیەکانی عێراق لە بەرەنگاربوونەوەی تیرۆر و راونانی پاشماوەکانی رێکخراوی تیرۆریستیی داعش خراونەتە بەرباس.

محەمەد شیاع سوودانی پەرۆشی حکوومەتەکەی بۆ پتەوترکردنی پەیوەندییەکان لەگەڵ ویلایەتە یەکگرتووەکانی ئەمریکا لەسەرجەم بوارەکاندا نیشان دا و رایگەیاندووە کە حکوومەتەکەی لە پەیوەندییە ھەرێمیی و نێودەوڵەتییەکانیدا سیاسەتێکی ھاوسەنگ پەیڕەو دەکات کە پشت بە بەرژەوەندی ھاوبەش دەبەستێت.

سەرۆکوەزیرانی عێراق جەختی کردووەتەوە لەسەر ئەوەی کە سەقامگیریی عێراق کلیلی ئاسایش و سەقامگیریی ناوچەکەیە و رایگەیاندووە کە عێراق رۆڵی نزیککردنەوەی بۆچوونەکان و کەمکردنەوەی گرژی و ئاڵۆزییەکان لە ناوچەکە دەگێرێت.

وەزیری بەرگریی ئەمریکا، ڵۆید ئۆستن پابەندبوونی وڵاتەکەی بە پاڵپشتیکردنی سەقامگیریی عێراق دووپات کردەوە، ھەروەھا خواستی ئەمریکای دەربڕیوە بۆ پتەوترکردنی پەیوەندی و ھاریکارییە ھاوبەشەکان لەگەڵ عێراق لەسەرجەم بوارەکاندا.

ئەمڕۆ سێشەممە، وەزیری بەرگریی ئەمریکا، ڵۆید ئۆستن بەسەردانێکی پێشتر رانەگەیەنراو گەیشتە بەغدا.