راگه‌یه‌ندراوی كۆشكی سپی له‌باره‌ی په‌یوه‌ندییه‌ ته‌له‌فۆنییه‌كه‌ی ئه‌ردۆغان و تره‌مپ

واشنتۆن – AA

له‌باره‌ی په‌یوه‌ندییه‌ ته‌له‌فۆنیه‌كه‌ی سه‌ركۆماری توركیا، ره‌جه‌ب ته‌یب ئه‌ردۆغان و سه‌رۆكی ئه‌مریكا، دۆناڵد تره‌مپ، كۆشكی سپی رایگه‌یاند: "هه‌ردوو سه‌رۆك گه‌یشتنه‌ رێككه‌وتن بۆ به‌رده‌وامیدان به‌ هەوڵ و هه‌ماهه‌نگی سه‌باره‌ت به‌ دروستكردنی ناوچه‌یه‌كی ئارام".

له‌ راگه‌یه‌ندراوه‌كه‌ی كۆشكی سپیدا تیشك خراوه‌ته‌ سه‌ر ئه‌وه‌ی كه‌ ئه‌ردۆغان و تره‌مپ جه‌ختیان له‌سه‌ر گرنگی په‌یوه‌ندییه‌كانی نێوان توركیا و ئه‌مریكا كردۆته‌وه‌ و تاوتوێی زۆر بابه‌تیان كردووه‌ به‌ بابه‌تی بازرگانیشه‌وه‌ و تیایدا هاتووه‌: " هه‌ردوو سه‌رۆك گه‌یشتنه‌ رێككه‌وتن بۆ به‌رده‌وامیدان به‌ هەوڵ و هه‌ماهه‌نگی سه‌باره‌ت به‌ دروستكردنی ناوچه‌یه‌كی ئارام.‌ به‌مه‌به‌ستی ئه‌نجامدانی كۆبوونه‌وه‌ی دیكه‌ له‌مباره‌یه‌وه‌ بریكاری وه‌زیری به‌رگری (ئه‌مریكا) پاتریك شاناهان و سه‌رۆكی ئه‌ركانی سوپای ئه‌مریكا جۆزیف ده‌نفۆرد ئه‌م هه‌فته‌یه‌ له‌ واشنتۆن له‌گه‌ڵ دانوستانكاره‌ توركه‌كان كۆده‌بنه‌وه‌".

سه‌رچاوه‌كانی سه‌رۆكایه‌تی كۆماری توركیاش ئاماژه‌یان به‌وه‌ داوه‌ له‌ په‌یوه‌ندییه‌ ته‌له‌فۆنییه‌كه‌دا ئه‌ردۆغان و تره‌مپ جگه‌ له‌ تاوتوێكردنی ته‌وه‌ره‌كانی نێوان هه‌ردوو وڵات و دوا پێشهاته‌كانی سووریا، هه‌روه‌ها جه‌ختیان له‌سه‌ر گرنگی پشتگیریكردن له‌ پرۆسه‌ی سیاسیی و پێداگیری هاوبه‌ش به‌رامبه‌ر هه‌ر جۆره‌ تیرۆرێك كردۆته‌وه‌.

ئه‌ردۆغان جارێكی دیكه‌ ویستی توركیای دووپات كردۆته‌وه‌ بۆ به‌رده‌وامیدان به‌ په‌یوه‌ندییه‌ نزیكه‌كان له‌گه‌ڵ هاوبه‌شه‌ ستراتیجیه‌كه‌ی.

هه‌ردوولا گه‌یشتوونه‌ته‌ لێكتێگه‌یشتن كه‌ كشانه‌وه‌ی هێزه‌كانی ئه‌مریكا له‌ سووریا به‌شێوه‌یه‌ك جێبه‌جێ بكرێت كه‌ له‌گه‌ڵ به‌رژه‌وه‌ندی هاوبه‌ش بگونجێت و زیان به‌ ئامانجه‌ هاوبه‌شه‌كان نه‌گه‌یه‌نێت.

ئه‌ردۆغان و تره‌مپ گه‌یشتوونه‌ته‌ لێكتێگه‌یشتنیش له‌باره‌ی گه‌یشتنه‌ ئامانجی بازرگانی به‌ بڕی ٧٥ ملیار دۆلار و به‌ره‌وپێشتربردنی په‌یوه‌ندییه‌ ئابوورییه‌كانی هه‌ردوو وڵات.