دانپێدانانی ئۆباما سه‌باره‌ت به‌ لیبیا

سەرۆكی ئەمریكا باراك ئۆباما، ئاماژەی بەوە كرد كە بەدرێژایی سەرۆكایەتی خراپترین هەڵە كە كردبێتی پلان دانەنان بووە بۆ قۆناغی دوای رووخاندنی موعەمەر قەزافی سەرۆكی لیبیا.

لە لێدوانێكیدا بۆ كەناڵی فۆكسی ئەمریكی، سەرۆكی ئەمریكا باراك ئۆباما لە ساڵی 2008ەوە تا ئێستا بۆ یەكەمجار باسی لە كاری پێشینەیی وهاندانەكانی سیاسەتی دەرەوەی قۆناغی سەرۆكایەتیەكەی كرد، هاوكات دەستێوەردانەكەی ساڵی 2011ی لیبیای بە خراپترین كاری سەردەمی سەرۆكایەتیی ناوبرد و گوتی: "ئەگەر لە لیبیادا لە پاش (رووخانی قەزافی) پلانی ئەمڕۆ دابنرایە شكستخواردوو نەدەبوو".

ئۆباما، باسی لەوەش كرد كە پاش دەستوەردانەكەی لیبیا دەیانتوانی كاری زیاتر بكەن، بەمەش ئۆباما دانی نا بەوەی كە ئامادەكاریان نەكردوە بۆ دوای قەزافی.

مانگی رابردوو، لە گۆڤاری ئەتڵانتیك چاوپێكەوتنێكی تایبەتی ئۆباما بڵاوكرایەوە كە بۆچوونی خۆی سەبارەت بە لیبیا خستبووە روو و تیایدا چەند سەركردەیەكی یەكێتی ئەورووپای بە "سەرقاڵ كردن" تۆمەتبار كرد و ئاماژەی بەوە كرد كە ئەو وڵاتانەش دەستیان هەبووە لە سەرهەڵدانی گرژییەكانی لیبیادا.

دوای لێدوانەكانی ئۆباما سەبارەت بە سەرهەڵدانی گرژیی لە لیبیادا كە پاش ئۆپەراسیۆنەكەی سەر ئەو وڵاتە سەری هەڵدا، گوتەبێژی ئەنجوومەنی ئاسایشی نەتەوەیی كۆشكی سپی نێد پرایس، روونكردنەوەی بۆ لێدوانەكانی ئۆباما دا كە تیایدا سەرۆكوەزیرانی بەریتانیا دێڤید كامیرۆن و سەركۆماری ئەو كاتەی فەڕەنسا نیكۆلا ساركۆزی كردبووە ئامانج، ئەوەش لە كاتێكدایە كە هەردوو وڵاتەكە هاوپەیمانی بەهێزی ئەمریكان.

لە كاتێكدا ناسەقامگیری لیبیا دوای رووخانی قەزافی هێشتا درێژەی هەیە، رێكخراوی تیرۆریستی داعش دەسەڵاتی خۆی بەسەر چەند ناوچەیەكی دیاری كراوی ئەو وڵاتەدا سەپاندووە.

ئۆباما لە چاوپێكەوتنەكەیدا باسی لەوەش كردووە كە گەورەترین دەستكەوت و سەركەوتنی لە سەردەمی سەرۆكایەتییەكەیدا، رزگاركردنی ئابووری وڵات بووە لە قەیرانە گەورەكەی ساڵی 2008دا.

سەرۆكی ئەمریكا ئۆباما، ئەوەشی خستۆتەروو خۆشترین رۆژی سەرۆكایەتییەكەی ئەو رۆژەبوو كە یاسای چاودێری تەندروستی تیایدا پەسەند كراوە كە بە "Obamacare" ناسراوە.

هەروەها سەبارەت بە ناخۆشترین رۆژی لە سەردەمی سەرۆكایەتیدا ئۆباما رایگەیاندووە "ناخۆشترین رۆژ، ئەو رۆژەبوو كە پاش كۆمەڵكوژیەكەی قوتابخانەی ساندی هۆكی سەرەتایی، سەردانی ناوچەكەی كردووە".