30 ئادار 2020•نوێکردنەوە: 31 ئادار 2020
واشنتۆن - AA
بەپێی هەواڵی راگەیاندنەکانی ئەمریکا فڕۆکەیەک پێداویستی پزیشکی لە چینەوە گەیشتووەتە نیویۆرک کە ١٣٠ هەزار دەمامکی جۆری "N95"، ملیۆنێک و ٨٠٠ هەزار دەمامکی نەشتەرگەری، ٧٠ هەزار گەرمیپێو و نزیکەی ١٠ ملیۆن دەستکێشی پزیشکی هەڵگرتووە.
هەروەها کۆشکی سپی لە روونکردنەوەیەکی نووسراودا ئەوەی خستوەتەڕوو کە بۆ بەرەنگاربوونەوەی ڤایرۆسی کۆرۆنای نوێ (COVID-19) لەنێوان هەردوو وڵاتدا لەسەر ئاستی کەرتی گشتی و کەرتی تایبەت هەماهەنگی کراوە، لەو چوارچێوەیەشدا بڕیارە چین ٢٠ فڕۆکە پێداویستی پزیشکی رەوانەی ئەمریکا بکات کە یەکەم فڕۆکەیان گەیشتووەتە نیویۆرک.
لە روونکردنەوەکەدا ئاماژە بەوەش دراوە کە هێنانی پێداویستییە پزیشکییەکان لەڕێی دەریاوە ٢٠-٤٠ رۆژی پێویستە، بەڵام بەهۆی مەترسی خێرا بڵاوبوونەوەی ڤایرۆسەکەوە رێگای ئاسمانییان هەڵبژاردووە و بڕیارە لە ماوەی دوو بۆ سێ رۆژدا هەر ٢٠ فڕۆکەکە بگەنە ئەمریکا.
لەلایەکی دیکەشەوە ناردنی پێداویستی پزیشکی لە چینەوە بۆ ئەمریکا لە کاتێکدا دۆناڵد ترەمپ بەردەوام ڤایرۆسی کۆرۆنای نوێ (COVID-19) بە "ڤایرۆسی چین" ناودەبات بووە جێی ستایشی هاووڵاتییە ئەمریکییەکان.
