ئەمریکا داوایەکی رووسیای سەبارەت بە هه‌ڵبژاردنه‌كانی سەرۆکایەتی ره‌ت كرده‌وه‌

واشنتۆن - AA
له‌گه‌ڵ ئه‌وه‌ی کە ماوه‌ی كه‌متر له‌ سێ هه‌فته‌ی ماوه‌ بۆ به‌ڕێوه‌چوونی هه‌ڵبژاردنی سه‌رۆكایه‌تی ئه‌مریكا، ناكۆكییه‌كی نوێ له‌نێوان ئه‌مریكا و رووسیا سه‌باره‌ت به‌ هه‌ڵبژاردنه‌كان سه‌ری هه‌ڵدا.
میدیاکانی ئه‌مریكا بڵاویان كردەوه‌، سه‌ركونسوڵی رووسیا له‌ شاری هیوستن پایتەختی ویلایه‌تی تێكساس، داوایەکی پێشكه‌ش به‌ به‌رپرسانی ویلایه‌تەکە كردووه‌ بۆئەوەی چاودێری چۆنێتی بەڕێوەچوونی هه‌ڵبژاردنه‌كانی سەرۆکایەتی بكات، به‌ڵام به‌شێوه‌یه‌كی نه‌رێنی وه‌ڵامی داواكارییه‌كه‌ی دراوه‌ته‌وه‌.
وه‌زیری کاروباری ده‌ره‌وه‌ی ویلایه‌تی تێكساس، كارلۆس كاسكۆ له‌ نووسراوێكدا كه‌ وه‌ك وه‌ڵام بۆ سه‌ركونسوڵی رووسیای ناردووه‌ له‌ باره‌ی بابه‌ته‌كه‌وه‌، ده‌ڵێت "ناتوانین وه‌ڵامێكی گونجاوی ئه‌و داواكارییه‌تان بده‌ینه‌وه‌ كه‌ پێشكه‌شی ناوه‌ندێكی هه‌ڵبژاردنتان كردووه‌".
هیچ ورده‌كارییه‌ك له‌باره‌ی هۆكاری ره‌ت كردنه‌وه‌ی داواكارییه‌كه‌ نه‌خراوه‌ته‌ڕوو.
له‌لایه‌كی دیكه‌وه‌ ئاماژه‌ به‌وه‌ كرا كه‌ حكوومه‌ته‌كانی هه‌ردوو ویلایه‌تی ئۆكلاهۆما و لویزیانا، ئه‌و داواكارییانه‌ی ره‌ت كردووه‌ته‌وه‌ كه‌ له‌سه‌ر هه‌مان بابه‌ت پێشكه‌شیان كراوه‌.
گوته‌بێژی وه‌زاره‌تی ده‌ره‌وه‌ی ئه‌مریكا، جۆن كیربی ئاماژه‌ی به‌وه‌ كرد كه‌ رووسیا له‌ چوارچێوه‌ی رێكخستنی هاریكاری و ئاسایشی ئه‌ورووپا، داواكاری پێشكه‌ش نه‌كردووه‌ بۆ چاودێریکردنی چۆنێتی بەڕێوەچوونی هه‌ڵبژاردنه‌كانی سەرۆکایەتی بكات.
كیربی ئه‌وه‌شی خسته‌ڕوو له‌ كاتێكدا رووسیا ده‌یتوانی له‌ مانگی ئه‌یلوولی رابردوودا له‌ رێگه‌ی رێكخستنی هاریكاری و ئاسایشی ئه‌ورووپا داواكاری پێشكه‌ش بكات، به‌ڵام نه‌یكرد. گوتیشی: "ئێمه‌ش له‌ رێگه‌ی نوێنه‌رایه‌تی رێكخستنی هاریكاری و ئاسایشی ئه‌ورووپاوه‌ داوامان پێشكه‌ش كرد بۆ چاودێریكردنی هه‌ڵبژاردنه‌كانی رووسیا".