ئەمریکا.. بەریەککەوتن لەنێوان لایەنگر و نەیارانی ترەمپ

نیویۆرک – AA

لە ئاکامی ئەنجامدانی خۆپیشاندانەکانی "رێپێوان لەبەر ترەمپ" لە ژمارەیەکی زۆری ویلایەتەکانی ئەمریکا بەریەککەوتن لەنێوان لایەنگرانی ترەمپ و خۆپیشاندەران روویدا.

دوێنێ چواری ئادار لە ٣٠ ویلایەتی ئەمریکا رێکخراوەکانی کۆمەڵگای مەدەنی و گرووپی کەمینەکان خۆپیشاندانی "رێپێوان لەبەر ترەمپ"یان ئەنجام دا.

لە کاتێکدا خۆپیشاندەران لە ویلایەت و شارەکانی وەک واشنتۆن دی سی، نیویۆرک، میشیگان، فلۆریدا بەشێوەیەکی ئارام رێپێوانیان دەکرد لە شاری بەرکەلەی ویلایەتی کالیفۆرنیا لەگەڵ لایەنگرانی ترەمپ بەریەککەوتن.

گرووپەکان بەمست و تێڵا کەوتنە شەڕو پەمپی گازی بیبەریان لە دژی یەک بەکار هێنابوو. دوای ئەوەی پۆلیس ویستی بەریەککەوتنەکە تەشەنە نەستێنێت بەلانیکەمەوە پێنج کەسی دەستگیر کرد.

لە ئاکامی خۆپیشاندانی ٣٠٠ کەسیش لە مینیسۆتا و بەریەککەوتنیان لەگەڵ ٥٠ لایەنگری ترەمپ، پۆلیس شەش کەسی دەستگیر کرد.

لە ئاکامی رووداوەکانی ویلایەتی واشنتۆنیش چوار کەس و لە تەننەسی-ش دوو کەسی دیکە دەستگیر کران.

لایەنگرانی ترەمپ لەبەردەم تاوەری ترەمپ لە نیویۆرک کۆبوونەوە و پشتیوانی خۆیان بۆ دۆناڵد ترەمپ دەربڕی.

لە زۆربەی ئەو خۆپیشاندانانە ژمارەی ئەو کەسانەی لە دژی ترەمپ خۆپیشاندانیان ئەنجام دا، لە لایەنگرانی ترەمپ زیاتر بوون.