ئەمریکا.. ئەرکدارکردنی سوپا و هێزە ئەمنییەکان بۆ رووبەڕووبوونەوەی کۆرۆنا

واشنتۆن - AA

وەزیری بەرگریی ئەمریکا، مارک ئێسپەر لە بارەگای وەزارەتی بەرگریی لێدوانی دا لەبارەی ڤایرۆسی کۆرۆنای نوێ (COVID-19) و رێوشوێنەکانی رێگریکردن لە بڵاوبوونەوەی ڤایرۆسەکە.

مارک ئێسپەر باسی لەوە کرد کە سوپای ئەمریکا هاوکاری دامودەزگاکانی دیکە دەکات لە رێوشوێنەکانی رووبەڕووبوونەوەی کۆرۆنا و گواستنەوەی پێداویستی پزیشکی.

وەزیری بەرگریی ئەمریکا، مارک ئێسپەر ئاماژەی بەوەشدا کە لەئێستادا، هەزار و ٥٦۰ کەس لە هێزەکانی ئاسایشی نیشتمانی لە ۲۲ ویلایەتی ئەمریکا هاوکاری پارێزگاکان دەکەن، ئەرکدارکردنی تەواوی سەربازەکانی ئاسایشی نیشتمانی پەیوەستە بە بڵاوبوونەوەی ڤایرۆسەکەوە و دەشێت ئەمە چەند رۆژ و هەفتەیەک بخایەنێت.

مارک ئێسپەر باسی لەوەش کرد کە تاقیگەکانی وڵاتەکەی کار لەسەر دۆزینەوەی پێکوتەیەکی تایبەت بە ڤایرۆسی کۆرۆنای نوێ (COVID-19) دەکەن و لانیکەم ۱۲ بۆ ۱٨ مانگ دەخایەنێت تا پێکوتەکە بدۆزرێتەوە.

لەلایەکی دیکەشەوە ژمارەی ئەو سەربازە ئەمریکییانەی تووشی ڤایرۆسەکە بوون گەیشتوەتە ۳٦ سەرباز.

هەروەها ۱۱ کارمەندی پنتاگۆن-یش تووشی کۆرۆنا بوون.