Tevfik Durul
09 ئەیلوول 2020•نوێکردنەوە: 09 ئەیلوول 2020
ئەسینا - AA
لە کەمپی پەنابەرانی مۆریا لە دوورگەی میدیلیی یۆنان ئاگرکەوتەوە.
ئاژانسی هەواڵیی فەرمی یۆنان ANA بڵاوی کردەوە، دوای کاتەکانی نیوە شەو لە چەند خاڵێکی جیاوازی کەمپی مۆریادا ئاگرکەوتووەتەوە.
لە کاتێکدا ژمارەیەکی زۆر پۆلیس و کارمەندی ئاگرکوژێنەوە رەوانەی ناوچەکە کراون، باس لەوە دەکرێت کە بەپێی ئامارە بەراییەکان، ئاگرەکە هیچ زیانێکی گیانیی لێ نەکەوتووەتەوە.
بەرپرسانی ناوچەکە باس لەوە دەکەن کە پەنابەران گواستراونەتەوە بۆ شوێنی ئارام و ژمارەیەک لە پەنابەرانیش بەرەو شاری میدیلی چوون.
بەهۆی تۆمارکردنی ٣٥ حاڵەتی تووشبوون بە پەتای ڤایرۆسی کۆرۆنای نوێ تیایدا، کەمپەکە لە هەفتەی رابردووەوە تا ئێستا کەرەنتینە کرابوو.
کەمپی مۆریا، نزیکەی ١٢ هەزار و ٥٠٠ پەنابەر لەخۆدەگرێت.
رێکخراوە مرۆییە نێودەوڵەتییەکان، هۆشداریان دابوو لە قەرەباڵغی لەڕادەبەدەری کەمپەکە و نەبوونی هەلومەرجی مرۆیی، لەگەڵ پەیڕەونەکردنی دوورەپەرێزی کۆمەڵایەتیی و بنەماکانی پاکوخاوێنی تیایدا.
