گیانلەدەستدان بە کۆرۆنا لە عێراق گەیشتە ١١ ھەزار و ١٧ کەس

ھەولێر ــ AA

وەزارەتی تەندروستیی و ژینگەی عێراق رایگەیاند، کۆی ئەو کەسانەی کە تا ئێستا لەسەرتاسەری عێراق بەھۆی ڤایرۆسی کۆرۆنای نوێ گیانیان لەدەستداوە، بەرزبووەتەوە بۆ ١١ ھەزار و ١٧ کەس.

وەزارەتی تەندروستیی و ژینگەی عێراق لە راگەیەنراوێکدا، دوایین ئاماری سەبارەت بە ژمارەی قوربانییانی ڤایرۆسی کۆرۆنا بڵاوکردەوە.

بەپێی راگەیەنراوەکە کە لە میانی ٢٤ کاتژمێری رابردوودا، سێ دوو ھەزار و ٤١٣ کەس تووشی ڤایرۆسی کۆرۆنای نوێ بوون و ٥١ کەسیش بەھۆی ڤایرۆسەکەوە گیانیان لەدەستداوە.

باس لەوەیش کراوە کە ھەر لەو ماوەیەدا، دوو ھەزار و ٩٩٥ تووشبووی دیکەی ڤایرۆسی کۆرۆنا، چاکبوونەتەوە.

راگەیەنراوەکەی وەزارەتی تەندروستیی و ژینگەی عێراق ئاماژەی بەوەیشداوە کە کۆی گشتیی تووشبووان بە ڤایرۆسی کۆرۆنا لە عێراق، گەیشتووەتە ٤٧٨ ھەزار و ٧٠١ کەس و لەو ژمارەیەش ١١ ھەزار و ١٧ کەس گیانیان لەدەستداوە و ٤٠٥ ھەزار و ٧٧٧ی دیکەیش چاکبوونەتەوە.