حەوت کۆمپانیای دەرمان لە ھەولێر داخران

هەولێر - AA

وەزارەتی تەندروستیی هەرێمی کوردستان رایگەیاند، بە ھۆکاری ھەبوونی سەرپێچی و کەمتەرخەمیی، حەوت کۆمپانیای دەرمان لە شاری ھەولێر داخران.

وەزارەتەکە لە راگەیەندراوێکدا بڵاویکردەوە، لە بەردەوامی گەڕان و بەدواداچوون و پشکنینە بەردەوامەکانی ھۆبەی چاودێری بازاڕ لە بەڕێوەبەرایەتی کۆنتڕۆڵی جۆری دەرمان بە ھەماھەنگی لەگەڵ پۆلیسی شارەوانی و بە مەبەستی ئاگاداربوون لە شێوازی کارکردنی کۆمپانیاکانی دەرمان ھەڵمەتێکی ئەنجامدا.

لە راگەیەندراوەکەدا ئاماژە بەوە دراوە کە بە ھۆکاری ھەبوونی سەرپێچی و کەمتەرخەمی حەوت کۆمپانیای دەرمان لە شاری ھەولێر داخران.

وەزارەتی تەندروستیی هەرێمی کوردستان جەختی لەوەشکردووەتەوە کە بەڕێوەبەرایەتی کۆنتڕۆڵی جۆری دەرمان لە رێگەی لێژنە تایبەتەکانی لە ئەرکەکانی خۆی بەردەوام دەبێت و بۆ رێگەگرتن لە سەرپێچییەکانی کەرتی دەرمان و دڵنیایی دەدات بە ھاووڵاتیان لە کواڵێتی بەرھەمە دەرمانسازییەکان.