لە دیاربەکر ئافرەتێک دوای ۷۲ کاتژمێر رزگار کرا

دیاربەکر - AA

لە شارۆچکەی باغلار سەربە پارێزگای دیاربەکر، ئافرەتێک ۷۲ کاتژمێر دوای مانەوەی لەژێر داروپەردوودا، رزگار کرا.

دوای ئەو بوومەلەرزە بەهێزانەی بەرەبەیانی دووشەممە، تورکیایان هەژاند و کاریگەرییان لەسەر ۱۰ پارێزگا دروست کرد، تیمەکانی فریاکەوتن بەردەوامن لە بەهاناوەچوونی لێقەوماوان.

لەو چوارچێوەیەشدا لە شارۆچکەی باغلار سەربە پارێزگای دیاربەکر، تیمەکانی فریاکەوتن دوای بیستنی دەنگی کەسێک لەژێر داروپەردووی بینایەکدا، دەستیان کرد بە لابردنی داروپەردووەکان و توانیان ئافرەتێک دوای ۷۲ کاتژمێر مانەوەی لەژێر داروپەردووی بیناکە رزگار بکەن.

دواتر ئافرەتەکە بەبرینداری گوازرایەوە بۆ نەخۆشخانە.