ئافیۆنکاراهیسار - AA

سەرۆکی پەرلەمانی تورکیا، نوعمان کورتوڵموش کە بەبۆنەی ١٠٣هەمین ساڵیادی ھێرشی مەزنەوە سەردانی ئافیۆنکاراهیساری کردووە، لەگەڵ نوێنەرانی ڕێکخراوەکانی کۆمەڵگەی مەدەنی کۆبووەوە.

لە کۆبوونەوەکەدا کورتوڵموش ئاماژەی بەوە کرد نزیکەی ٥٠ ساڵی مێژووی ١٠٠ ساڵەی کۆمار بە بەرەنگاربوونەوەی تیرۆر تێپەڕیوە و، تورکیا وەک وڵاتێک کە ئێستا ناوەندی سەقامگیریی ناوچەکەیە، یەکێتیی و یەکگرتوویی دەستەبەر دەکات، بەرەو پێشەوە هەنگاو دەنێت.

گوتیشی: "دڵنیابن لەوە لە هیچ خاڵێکی ئەم پرۆسەیەدا هیچ سەودایەک لەگەڵ ڕێکخراوی تیرۆریستیی نەکراوە و لەمەودواش ناکرێت".

سەرۆکی پەرلەمانی تورکیا کورتوڵموش باسی لەوە کرد ئەو کۆميسیۆنەی لە پەرلەمان دامەزراوە "کۆميسیۆنی هاوپشتی نەتەوەیی، برایەتی و دیموکراسی" کۆميسیۆنێک نییە هەموو کێشەکانی تورکیا چارەسەر بکات و، ڕایگەیاند: "زۆر بە ڕوونی دەیڵێم کە بچووکترین داواکاری نییە لەبارەی مشتومڕی خۆبەڕێوەبەری، مشتومڕی ناوچەیەکی جیاواز و ئەوەی زمانە جیاوازەکانی دایک ببنە زمانی فەڕمی. هەر وەک چۆن بچووکترین کار نەکراوە سەبارەت بە هێنانە دەرەوە و ئازادکردنی سەرکردەی ڕێکخراوەکە، لەمبارەیەشەوە هیچ داوایەک جێگەی باس نییە".

گوتیشی: "ئایا ئەوە دەکرێت دانوستانی ئاشتییە؟ بە ڕوونی دەیڵێم کورد و تورک لەم وڵاتەدا نەجەنگاون تا ئاشت ببنەوە. ئەوەی لەم وڵاتەدا ڕوویدا ئەوە بوو کە بە بەکارهێنانی نەتەوەی کورد گرووپی تیرۆریستییان لەو ڕێگەیەوە دروست کرد و بە بەکارهێنانی ئەمانە سیناریۆی دابەشبوون و پارچە پارچەبوونیان لە تورکیادا دروست کرد. ئێستا پشتیوان بە خودا هەموو تورکیا بەیەکەوە خاوەندارێتی لەمە دەکات. باوەڕ بکەن زۆرینەی گەلی کوردمان لە ڕۆژهەڵات و باشووری ڕۆژهەڵاتی ئانادۆڵو دڵخۆشن بەم پرۆسەیە و دەڵێن ئیدی چەک نابێت، ئیدی بۆمب ناتەقێتەوە، ئیدی بە هیچ شێوەیەک خەڵک خەم بۆ منداڵەکانیان ناخۆن و ناگرین. بەم شێوەیە پشتیوانی لەم پرۆسەیە دەکەن".

کورتوڵموش باسی لەوە کرد کە نموونەی تورکیا دەکەنە دیاری بۆ جیهان و، ڕایگەیاند: "لە سلێمانی، کەرکووک و هەولێر و هەموو ناوچەکانی دیکەوە خەڵک هاتوون و لە چاناککالە شەهید بوون. لەبەرئەوە لە ڕووی مێژوویی و کلتووری و ئاینییەوە بچووکترین پرس نییە ببێتە ھۆی جیابوونەوە لە نێوان گەلەکەماندا. دەزانین ھەموو ئەو پرسانەی خراونەتە نێوانمان دەستکردن و ھەموویان ئەنجامی کۆمەڵێک پڕۆژەی دەرەکین و ھەموومان بەیەکەوە نایانهێڵین".

هەروەها کوورتولموش باسی لەوە کرد کە ئەم پرۆسەیە پەیوەندی بە تورکیاوە نییە و، لە جیهاندا گفتوگۆ لە نێوان ڕێکخراوە تیرۆریستییەکان و حکوومەتەکاندا هەیە.