خۆپێشاندان لە ئەنقەرە بۆ ماوەیەکی کاتی قەدەغە کرا

ھەموو جۆرە خۆپێشاندان، كۆبوونەوە و گردبوونەوەیەك لە شوێنە گشتییەكانی شاری ئەنقەرە لە لایەن پارێزگای ئەنقەرەوە تاوەكو ٣٠ی تشرینی دووەمی داهاتوو، قەدەغە كرا.
بەپێی راگەیەنراوێكی پارێزگای ئەنقەرە، ئاماژەی بەوە كراوە كە ھەوڵ بۆ ئەنجامدانی ھێرش لەلایەن رێكخراوانی تیرۆریستی لەئارادایە و راشگەیەنراوە كە لەوانەیە كۆبوونەوە و خۆپێشاندان و چالاكییەكانی لەو جۆرە لە شوێنە گشتییەكان بكرێتە ئامانج.
لە راگەیەنراوەكەدا ھاتووە "لە پێناو پاراستنی گیان و ماڵی ھاووڵاتییان، پارێزگاریكردن لە شیرازەی وڵات، رێگریكردن لە تاوان و پاراستنی ماف و ئازادییەكان، بەپێی مادەی ١١ی یاسای باری ناسایی و ژمارە یاسای ٢٩١١ی تایبەت بە خۆپێشاندان و كۆبوونەوە لە شوێنە گشتییەكانی وەك رێگە، گۆڕەپان، شەقام، كۆڵان و پاركەكان لە ١٧ی تشرینی یەكەمی ٢٠١٦ تاوەكو ٣٠ی تشرینی دووەمی داهاتوو خۆپێشاندان و كۆبوونەوە قەدەغە كرا".
چالاكییەكانی دامودەزگاكانی حكوومی و ناحكومی لە شوێنە گشتییەكان لەلایەن پارێزگای ئەنقەرەوە مۆڵەتی پێ دەدرێت.
لە راگەیەنراوەكەدا ھەروەھا ھاتووە "ئەوانەی لەگەڵ بڕیاری قەدەغەكردنەكەدا نەگونجێت، لە چوارچێوەی یاساكان رێكاری یاسایی لەبارەوە دەكرێت".