ئەردۆغان بەڵگەنامەی خۆکاندیدکردنی بۆ سەرۆکایەتی کۆمار واژوو کرد

ئەنقەرە - AA

سەرۆکی گشتی ئاک پارتی و سەرکۆماری تورکیا، رەجەب تەیب ئەردۆغان بەڵگەنامەی خۆکاندیدکردنی بۆ سەرۆکایەتی کۆماری تورکیا واژوو کرد کە بڕیارە هەڵبژاردنی پێشوەختەی سەرۆکایەتی کۆمار و پەرلەمانی تورکیا لە ٢٤ی حوزەیرانی داهاتوو بەڕێوەبچێت.

ئەردۆغان لە هەژماری تایبەتی خۆی لە تۆڕی کۆمەڵایەتی تویتەر وێنەیەکی بڵاوکردەوەتەوە کە واژوو لەسەر بەڵگەنامەکە دەکات و پێشکەش بە هەردوو پەرلەمانتاری پارتەکەی، موستەفا ئەلیتاش و محەمەد مووش دەکات.

چاوەڕوان دەکرێت ئەردۆغان سبەی شەممە هەڵمەتی بانگەشەی لە شاری ئیزمیر دەست پێ بکات.

رۆژی هەینی رابردوو پەرلەمانی تورکیا پرۆژە پێشنیاری هاوبەشی ئاک پارتی و مەهەپەی پەسند کرد بۆ ئەنجامدانی هەڵبژاردنی پێشوەختەی سەرۆکایەتی کۆمار و پەرلەمانی تورکیا لە ٢٤ی حوزەیرانی داهاتوو.