سەرۆکی ئەنجوومەنی نوێنەرانی عێراق لە تارانە

تاران

سەرۆکی ئەنجوومەنی نوێنەرانی عێراق سەلیم جبووری بە سەردانێکی فەرمی گەیشتە شاری تاران و لەگەڵ ھاوتا ئێرانییەکەی، عەلی لاریجانی کۆبووەوە.

جبووری و لاریجانی لە نێو باڵەخانەی پەرلەمانی ئێران، لە دوای کۆبوونەوەی نێوان شاندەکان کۆنگرەیەکی رۆژنامەوانی ھاوبەشیان رێکخست.

لاریجانی لە کۆنگرە رۆژنامەوانیەکەدا گوتی: "ھەمیشە گرنگیمان بە یەکپارچەیی خاکی عێراق داوە. بۆ سەقامگیری ناوچەکە پێویستە یەکپارچەیی خاکی عێراق بپارێزرێت".

لاریجانی راشیگەیاند کە لە کۆبوونەوەکەدا تاوتوێی چۆنییەتی زیاتر بەھێزکردنی پەیوەندییەکانی ھەردوو وڵات کراوە و کۆبوونەوەکانیش لەمەڕ ھەڵگرتنی ئەو لەمپەرانەی کە رێگرن لە فراوان بوونی چالاکی بازرگانی ئێران و عێراق بەردەوامە.

لای خۆیەوە سەلیم جبووری جەختی لەوە کردەوە کە ئەوان لە بواری بازرگانی بوارەکانی دیکە ھەمیشە دەیانەوێت پەیوەندییەکانیان لەگەڵ ئێران بەھێز بکەن.