سەردانی وەزیری دەرەوەی ئێران بۆ عێراق

بەغدا - AA

وەزیری دەرەوەی ئێران، محەمەد جەواد زەریف ئێوارەی ئەمڕۆ یەکشەممە بە سەردانێکی فەرمی گەیشتە بەغدا.

سەرچاوەیەک لە وەزارەتی دەرەوەی عێراق کە نەیویست ناوی ئاشکرا بکرێت بۆ ئاژانسی ئانادۆڵو گوتی "وەزیری دەرەوەی ئێران، محەمەد جەواد زەریف بە سەرۆکایەتی شاندێکی باڵای حکوومی وڵاتەکەی گەیشتە فڕۆکەخانەی بەغدا و لە لایەن هاوتا عێراقییەکەی، محەمەد حەکیم پێشوازی لێکرا"

ئەو سەرچاوەیە روونیکردەوە کە زەریف لە میانی سەردانەکەی بۆ بەغدا لەگەڵ هەریەک لە سەرۆکوەزیرانی عێراق، عادل عەبدولمەهدی و سەرۆکی ئەنجوومەنی نوێنەران، محەمەد حەلبوسی و سەرکۆماری عێراق، بەرهەم ساڵح کۆدەبێتەوە، هەروەها چاوی دەکەوێت بە ژمارەیەک سەرکردەی سیاسیی دیکە".

بەپێی هەمان سەرچاوە، سەردانەکەی وەزیری دەرەوەی ئێران بۆ عێراق پێنج رۆژ دەخایەنێت.

بەپێی بەیاننامەیەکی باڵیۆزخانەی ئێران لە بەغدا، و بەپێی ئەجێندای سەردانەکەی، وەزیری دەرەوەی ئێران لە بەغدا بەشداری لە کۆڕبەندێکی هاوبەش لەنێوان بازرگان و وەبەرهێنەرانی نێوان هەردوو وڵات دەکات.

هەر بەپێی بەیاننامەکەی باڵیۆزخانەی ئێران لە بەغدا، بڕیارە وەزیری دەرەوەی ئێران سەردانی هەولێر بکات و زنجیرەیەک دیدار و کۆبوونەوە لەگەڵ بەرپرسانی باڵای هەرێمی کوردستان ئەنجام دەدات و بەشداری لە کۆڕبەندی ئابووری نێوان بازرگانانی ئێرانی و عێراق لە هەولێر بکات و دواتر سەردانی پارێزگای سلێمانی دەکات و چاوی بە سەرکردەی پارتە سیاسییەکان لە سەروویانەوە بەرپرسانی یەکێتی نیشتمانی کوردستان دەکەوێت.

لە بەیاننامەکەی باڵیۆزخانەی ئێران لە بەغدا هاتووە، رۆژی چوارشەممە وەزیری دەرەوەی ئێران سەردانی پارێزگای کەربەلا باشووری عێراق دەکات و بەشداری لە کۆڕبەندی ئابووری نێوان وەبەرهێنەرانی ئێرانی و عێراق لە پارێزگاکانی ناوەڕاست و باشووری عێراق دەکات و دواتر دەچتە پارێزگای نەجەف باشووری عێراق.