عەباس عەراقچی: "ئێمە بە نیازپاکی بەشداری لە دیپلۆماسی دەکەین"

ئەنقەرە ــ AA

وەزیری دەرەوەی ئێران، عەباس عەراقچی بەر لە دەستپێکردنی دانوستاندنەكان لەگەڵ ئەمریکا لە مەسقەت پایتەختی عومان ڕایگەیاند کە بە نیازپاکی بەشداری دیپلۆماسی دەکەن و بەرگریی لەسەر مافەکانیان دەکەن.

چاوەڕوان دەکرێت ئەمڕۆ ھەینی دانوستان لەنێوان ئێران و ئەمریکا تایبەت بە پرسی ئەتۆمی لە مەسقەت پایتەختی عومان، ئەنجام بدرێت.

عەباس عەراقچی بەر لە دەستپێکردنی دانوستانەکان لە ھەژماری خۆی لە تۆڕی کۆمەڵایەتی ئێکس نووسیویەتی: "ئێمە بە نیازپاکی بەشداری دیپلۆماسی دەکەین و بەتوندی بەرگریی لە مافەکانمان دەکەین".

جەختی لەوەش کردووەتەوە، پێویستە ئەو بەڵێنانەی کە بە ئێران دراون، جێبەجێ بکرێن، ھەروەھا نووسیوویەتی: "یەکسانی و ڕێزی ھاوبەش و بەرژەوەندی ھاوبەش تەنھا وشە نین، بەڵکو بنەمای پێویستن بۆ ڕێککەوتنێکی ھەمیشەیی".