بە ئاراستەکردنی دڕۆن ھێرش کرایە سەر کێڵگەی غازی کۆرمۆر
- بە ئاراستەکردنی دڕۆن ھێرش کرایە سەر کێڵگەی غازی کۆرمۆر لە ناحیەی قادر کەرەم سنووری قەزای چەمچەماڵ سەربە پارێزگای سلێمانی و بەھۆیەوە ھەناردەی غاز بۆ وێستگەکانی کارەبا ڕاگیرا.
Arbil
ھەولێر ــ AA
حکوومەتی ھەرێمی کوردستان-عێراق ڕایگەیاند کە بە ئاراستەکردنی دڕۆن ھێرش کرایە سەر کێڵگەی غازی کۆرمۆر لە ناحیەی قادر کەرەم سنووری قەزای چەمچەماڵ سەربە پارێزگای سلێمانی.
وەزارەتی سامانە سرووشتییەکان و وەزارەتی کارەبای ھەرێمی کوردستان لە ڕاگەیاندراوێکی هاوبەشدا ئاماژەیان بەوەداوە کە شەوی ٢٦ لەسەر ٢٧ی ئەم مانگە، کاتژمێر ١١:٣٠، ھێرش کراوەتەوە سەر کێڵگەی غازی کۆرمۆر.
ڕاشیانگەیاندووە کە بەھۆی ھێرشەکەوە، بە تەواوی ھەناردەی غاز بۆ وێستگەکانی بەرهەمهێنانی کارەبا ڕاگیرا.
باسیان لەوەش کردووە کە ئێستا تیمەکانی ھەردوو وەزارەتی سامانە سرووشتییەکان و کارەبا لەگەڵ کۆمپانیای داناغاز لەسەر ھێڵن بۆ بەدواداچوونی لێکەوتەکانی هێرشەکە و ئاسایکردنەوەی بارودۆخەکە.
ھاوکات سەرچاوەیەکی ئەمنی بە میدیای خۆجێی ڕایگەیاندووە کە بەھۆی ھێرشەکەوە، ئاگرێکی گەورە لە کێڵگەی غازی کۆرمۆر کەوتووەتەوە.
سەرچاوەکە ئاماژەی بەوەشداوە کە ھێرشەکە، جگە لە زیانی ماددی ھیچ زیانێکی گیانی لێ نەکەوتووەتەوە.
کێڵگەی غازی کۆرمۆر پێشتریش بە ئاراستەکردنی دڕۆن و مووشەک کرابوویە ئامانج.
