برێنت بە ٥٠ دۆلار و ٤٥ سەنت مامەڵەی پێوەدەکرێت

ئیستانبوڵ ــ AA

بە ھۆی فشارەکانەوە لە بارەی خستنەڕووی نەوتی زیاترەوە لە بازاڕەکانی جیھاندا لە مامەڵەکانی ئەمڕۆ چوارشەممەدا، نرخی یەک بەرمیل خاوی برێنت لە بازاڕەکاندا، نزمترین ئاستی ١٦ مانگی رابردووی تۆمارکرد و بە ٥٠ دۆلار و ٤٥ سەنت مامەڵەی پێوەکرا.

وێرای رێککەوتنەکەی نێوان وڵاتانی ئەندام لە رێکخراوی ئۆپێک و بەرھەمھێنەرانی سەربەخۆ بەڕابەڕایەتی رووسیا لەبارەی کەمکردنەوەی ئاستی بەرھەمھێنان، بەڵام نرخی یەک بەرمیل خاوی برێنت لە بازاڕەکاندا نزیکبووەتەوە لە ٥٠ دۆلار.

لە میانی ئەم مانگەدا، وڵاتانی ئەندام لە ئۆپێک و بەرھەمھێنەرانی سەربەخۆ بەڕابەرایەتی رووسیا گەیشتنە رێککەوتنێک کە بەپێی رێککەوتنەکە ئاستی بەرھەمھێنان بە یەک ملیۆن و ٢٠٠ ھەزار بەرمیل لە رۆژێکدا لە ساڵی ٢٠١٩دا بۆ ماوەی شەش مانگ، کەم دەکەنەوە.

لە کاتژمێر ٠٨:٠٢ نرخی یەک بەرمیل خاوی برێنت لە بازاڕەکانی جیھاندا، دابەزی و بە ٥٠ دۆلار و ٤٥ سەنت مامەڵەی پێوەکرا.

بە پێچەوانەوە نرخی یەک بەرمیل خاوی ئەمریکا لە بازاڕەکانی جیھاندا، بەرزبوونەوەی تۆمارکرد و بە ٤٢ دۆلار و ٧٢ سەنت مامەڵەی پێوەدەکرێت.