ھەولێر – AA

ئامادەکاری دەکرێت لەبارەی سەردانی سەرۆکی ھەرێمی کوردستان، نێچیرڤان بارزانی بۆ ئازەربایجان کە بڕیارە لەسەر ‏بانگھێشتی فەرمی سەرکۆماری ئەو وڵاتە، ئیلھام عەلیێڤ ئەنجامی بدات.

ماڵپەڕی سەرۆکایەتیی ھەرێمی کوردستان بڵاوی کردەوە کە نێچێرڤان بارزانی پێشوازیی کردووە لە ھەڵسوڕێنەری باڵیۆزخانەی ‏ئازەربایجان لە عێراق، نەسیر مەمدۆف.

راشیگەیاندووە کە لە کۆبوونەوەکەدا، برەودان بە پەیوەندییەکانی عێراق و ھەرێمی ‏کوردستان لەگەڵ ئازەربایجان تاوتوێ کراوە.‏

ھەروەھا ھەردوولا ھاوڕا بوون کە زەمینە و دەرفەتی باش ھەن بۆ برەودان بە پەیوەندییەکان ‏بەتایبەتی لە بواری ئابووریی، بازرگانیی و گەشتیارییدا، لەوبارەیەوە باسیان لە ‏دەستپێکردنی پرۆسەی کردنەوەی کۆنسولخانەی ئازەربایجان لە ھەرێمی کوردستان ‏و رێکاری‌ پێویست کردووە کە پێشتر لە کۆبوونەوەی‏ سەرۆکی ھەرێمی کوردستان و سەرکۆماری ئازەربایجان لە میونخ بڕیاری لێ ‏درابوو.‏

لە تەوەرێکی دیکەی کۆبوونەوەکەدا، گفتوگۆکراوە لەبارەی سەردانی سەرۆکی ھەرێمی کوردستان بۆ باکۆ کە بڕیارە لەسەر ‏بانگھێشتی فەرمی سەرکۆماری ئازەربایجان، ئیلھام عەلیێڤ ئەنجامی بدات.