ئەنقەرە - AA

سەرکۆماری تورکیا، ڕەجەب تەیب ئەردۆغان ڕایگەیاند: "ئارەقەی نێوچەوان و ڕەنج هێندە پیرۆز و بەرز و شایەنی ڕێزلێنانن کە ناتوانرێت بە هیچ ئایدۆلۆجیا، پارت، دەستە و گرووپێکەوە ببەسترێنەوە. تەنیا لە ڕوانگەیەکی مافەکانەوە دەتوانرێت بە شێوەیەکی دروست لە پەیوەندی نێوان کرێکار و خاوەنکار تێبگەین".

لە میانی بەشداری کردنی لە "بەرنامەی ٥٠هەمین ساڵیادی دامەزراندنی کۆنفیدراسیۆنی سەندیکاکانی کرێکاران-هاک (HAK-İŞ)"دا، سەرکۆمار ئەردۆغان گوتارێکی پێشکەش کرد.

لە گوتارەکەیدا سەرکۆمار جارێکی دیکە پیرۆزبایی لە HAK-İŞ کرد و، ڕایگەیاند: "HAK-İŞ لە ڕۆژی دامەزراندنییەوە بێ ئەوەی بایەخ بە تێگەیشتنە سەندیکالییە ئایدۆلۆجییەکانی سەردەمی جەنگی سارد بدات، نموونەیەکی سەندیکالیی ڕێکوپێک و بەردەوام و جێگیری نیشانداوە و، ٥٠ ساڵە پێشەنگایەتی سەندیکالیزم لە وڵاتەکەماندا گرتووەتە ئەستۆ".

گوتیشی: "ئارەقەی نێوچەوان و ڕەنج هێندە پیرۆز و بەرز و شایەنی ڕێزلێنانن کە ناتوانرێت بە هیچ ئایدۆلۆجیا، پارت، دەستە و گرووپێکەوە ببەسترێنەوە. تەنیا لە ڕوانگەیەکی مافەکانەوە دەتوانرێت بە شێوەیەکی دروست لە پەیوەندی نێوان کرێکار و خاوەنکار تێبگەین''.

سەرکۆمار ئەردۆغان باسی لە گرنگیی سەندیکاکان کرد و، ڕایگەیاند: "بێگومان سەندیکاکان بۆ ڕێکخستنی ڕەنج و خەباتی مافەکان زۆر گرنگن. بەڵام با لەبیرمان نەچێت کە بوونی سەندیکاکانمان بە کرێکارەوە بەندە، بە زەحمەتکێشەوە بەندە. سەندیکاکان هەن چونکە کرێکار هەیە، چونکە زەحمەتکێش هەیە".

ڕاشیگەیاند: "هەموو بەیەکەوە بینیمان کاتێک حکوومەتە تەمەن کورتەکان دەکەونە دەست کادرە لێهاتوو و خاوەن ویژدانەکان، وڵات لە ماوەیەکی کورتدا دەتوانێت چ شتانێک بەدەستبهێنێت".

هەروەها سەرکۆمار ئەردۆغان ئاماژەی بە چارەسەرکردنی کێشەی گرانیی کرد و، ڕایگەیاند: "بەدڵنیاییەوە کێشەی گرانی کە هەموومانی توشی کێشە کردووە، چارەسەر دەکەین".